Շուշիի «Տանկ» հուշարձանի մոտ այսօր տեղի է ունեցել Թայլանդի մայրաքաղաք Բանգքոքում անցկացված «Աշխարհի Մուայ Թայ» առաջնությունում աշխարհի չեմպիոնի տիտղոսը նվաճած, ԼՂՀ Մարտարվեստների Ասոցիացիայի սան, Ստեփանակերտի քաղաքապետարանին կից մանկապատանեական մարզադպրոցի Մուայ Թայ խմբի մարզիկ Դավիթ Հայրապետյանի դիմավորման արարողությունը:
Շուշիում հանդիսավորապես դիմավորել են արցախցի չեմպիոն Դավիթ Հայրապետյանին (լուսանկարներ)
ՍՏԵՓԱՆԱԿԵՐՏ, 20 ՄԱՐՏԻ, ԱՐՑԱԽՊՐԵՍ։ Նրան դրոշներով ու պաստառներով դիմավորելու էին գնացել ընկերներն ու երկրպագուները, ովքեր աշխարհի չեմպիոնին դիմավորել են ծափահարություններով ու դափնեպսակով։
Այնուհետև մարզիկ՝ Դավիթ Հայրապետյանը և գլխավոր մարզիչ՝ Գարեգին Աղաբալյանը, դիմավորող խմբի հետ միասին ծաղիկներ են դրել Ստեփանակերտի եղբայրական գերեզմանոցի հուշահամալիրում:
«Արցախպրես»-ի թղթակցի հետ զրույցում Դավիթ Հայրապետյանն ասաց, որ թեև բացարձակ հաղթանակ է տոնել, բայց խոստովանեց, որ այն դժվարությամբ է իրեն հաջողվել։
«Ունեցել եմ չորս մենամարտ: Ամեն օր պարապմունքներ ենք անց կացրել և հույս ունեինք որ պետք է հաղթեմ»,-ասել է Դ. Հայրապետյանը և հավելել, որ տպավորությունները շատ մեծ են։
ԼՂՀ մարտարվեստների ասոցիացիայի փոխնախագահ, ասոցիացիայի գլխավոր մարզիչ՝ Գարեգին Աղաբալյանը նշել է, որ առաջնությունը կազմակերպված էր շատ բարձր մակարդակով, որին մասնակցում էին 90-ից ավել երկրներ:
Նշենք նաև, որ Դավիթ Հայրապետյանը անցած տարվա նոյեմբերին հանդես է եկել նաև Լիտվայի մայրաքաղաք Վիլնյուսում անցկացված «Եվրոպայի կա-մեկ» առաջնությունում մինչև 68 կգ քաշային կարգում, որտեղ եզրափակիչ փուլում նոկաուտի է ենթարկել Բելոռուսի ներկայացուցչին և նվաճել Եվրոպայի չեմպիոնի տիտղոսը:
Հիշեցնենք, որ ԼՂՀ մարտարվեստների ասոցացիայի հավաքականը՝ գլխավորությամբ ասոցիացիայի փոխնախագահ, ասոցիացիայի գլխավոր մարզիչ՝ Գարեգին Աղաբալյանի, «Հայաստանի Պրոֆեսիոնալ Մուայ Թայ» (Թայլանդական Բռնցքամարտ) ֆեդերացիայի կազմում (գլխավորությամբ ֆեդերացիայի նախագահ՝ Արամ Աբրհամյանի) ընթացիկ տարվա մարտի 7-18 մասնակցում են Թայլանդի մայրաքաղաք Բանգքոքում կայացած «Աշխարհի Մուայ Թայ» առաջնությանը, մարզիկներ՝ Դավիթ Հայրապետյան (Արցախ), Արմեն Գրիգորյան (ՀՀ)։
