Այսօր Ստեփանակերտի Ստեփան Շահումյանի անվան օղակաձև պուրակում ԼՂՀ մշակույթի և երիտասարդության հարցերի նախարարության նախաձեռնությամբ տեղի է ունեցել ֆոտոցուցահանդես:
Ստեփանակերտում կայացել են բացօթյա ֆոտոցուցահանդես և մարտավարժանքներ՝ նվիրված Եռատոնին (լուսանկարներ)
ՍՏԵՓԱՆԱԿԵՐՏ, 9 ՄԱՅԻՍԻ, ԱՐՑԱԽՊՐԵՍ։ Լրագրողների հետ ճեպազրույցում Շուշիի կերպարվեստի թանգարանի տնօրեն Լուսինե Գասպարյանը նշել է, որ ցուցադրության են ներկայացվել «Հայրեր և որդիներ» շարքը:
Ցուցահանդեսի շրջանակում ներկայացվել են Հայրենական մեծ պատերազմի և Արցախյան ազատամարտի տարիներին մարտադաշտում նկարահանված լուսանկարներ:
Արցախյան գոյամարտը ներկայացնող շարքը՝ ազատամարտիկ , լուսանկարիչ , ռուսաստանաբնակ Վյաչեսլավ Ավետիսյանի հեղինակային աշխատանքներն են։ «Հայրեր» շարքը ներկայացնում է ծննդով արցախցի Հայրենական մեծ պատերազմի մասնակիցներին, հերոսներին, մարշալներին:
Արցախյան ազատամարտի տարիները և մարտական իրադարձությունները պատկերող լուսանկարները ՝ ներկայացված էին «Որդիներ» շարքում, որոնք առաջին անգամ էին ցուցադրվումԱրցախում։ «Բացօթյա ցուցադրության ենք ներկայացրել այն լուսանկարները, որոնք համահունչ են օրվա խորհրդին, և արցախցիները մեծ ոգևորությամբ են ընդունել նախագիծը»,- ասել է Լ. Գասպարյանը։
Այնուհետև Վերածննդի հրապարակում տեղի է ունեցել ԼՂՀ ՊԲ հետախուզական ստորաբաժանումների պարապմունքների, ինչպես նաև սպառազինության, ռազմական տեխնիկայի ցուցադրություն և դաշտային խոհանոցի ծավալում:
Միջոցառումներին ներկա են եղել ԼՂՀ նախագահ Բակո Սահակայանը, ԱԺ նախագահ Աշոտ Ղուլյանը, վարչապետ Արայիկ Հարությունյանը, ՊԲ նախարար Մովսես Հակոբյանը, հայկական երկու հանրապետությունների բարձրաստիճան պաշտոնյաներ, հյուրեր Սփյուռքից և արտերկրից:
Կայացել է նաև ռետրո ավտոմեքենաների ցուցադրություն, որի շրջանակներում ներկայացվել են տարբեր ժամանակների ու մակնիշների ավտոմեքենաներ: