Դերսիմցի 17 հայեր հայկական ինքնությանը վերադառնալու ճանապարհին հերթական քայլն են կատարել՝ մկրտվելով Ստամբուլի Յեշիլքյոյ շրջանի հայկական առաքելական եկեղեցում և ընդունելով քրիստոնեություն:
Դերսիմահայերը մկրտվել են. հայկական արմատներին վերադարձի գործընթացը շարունակվում է
ՍՏԵՓԱՆԱԿԵՐՏ, 13 ՄԱՅԻՍԻ, ԱՐՑԱԽՊՐԵՍ։ Մկրտության արարողությունն անձամբ ղեկավարել է Պոլսի Հայոց պատրիարքի փոխանորդ Արամ արքեպիսկոպոս Աթեշյանը:
«Արմենպրես»-ի հետ զրույցում Դերսիմի հայերի միության հիմնադիր և նախկին նախագահ Միրան Փրկիչը հայտնեց, որ մկրտության արարողությանը զուգահեռ երկու զույգ ամուսնական արարողություն է եղել եկեղեցում: Նա պատմեց, որ դերսիմահայերը նախքան մկրտությունը 6-ամսյա կուրսեր են անցել, որոնք նախապատրաստվել են Պոլսո Հայոց պատրիարքարանի կողմից: «Ինչպես մյուս հարցերում, այս դեպքում ևս առաջադեմ ենք լինելու և շատ արագ դերսիմահայերին ծանոթացնելու ենք սեփական ազգի հետ»,- նշեց Փրկիչը:
Մկրտության արարողության մասնակիցներից մեկը` Լեա Յոնջա Գյուլթեքինը, «Արմենպրես»-ի հետ զրույցում հայտնեց իր հուզմունքն ու ոգևորությունը կատարվածի առնչությամբ: «Հայրս և մայրս տարիներ առաջ եկեղեցում ամուսնացան: Սակայն իրենց ամուսնության ժամանակ մեզ չմկրտեցին, քանի որ վախենում էին իրենց շրջապատի հնարավոր արձագանքներից: Ավելի ուշ ես և իմ քույրերն ու զարմիկները նստեցինք և խոսեցինք, թե ինչո՞ւ չենք վերադառնում մեր ինքնությանը: Շուտով մենք որոշում կայացրեցինք և հանդիպեցինք Արամ Աթեշյանին»,- պատմեց Լեան՝ հավելելով, որ 6 ամիս շարունակ կանոնավոր կերպով հաճախել են պատրիարքարանի կողմից կազմակերպվող դասընթացներին: «Կարծում եմ, որ լավագույն զգացումն է մեր պապերի ու տատերի հետքերով գնալը»,- նշեց նա:
Պատմական Հայաստանի տարածքում Դերսիմն այն քիչ բնակավայրերից է, որի տարածքում մինչ օրս բնակվող հայերի շրջանում վերջին տարիներին նկատվում է սեփական արմատներին վերադառնալու ակտիվ գործընթաց: Դերսիմահայերը 2015 թվականի մարտից սկսել են հայերենի դասընթացների մասնակցել, որոնց երկրորդ փուլը մեկնարկել է մայիսի սկզբին: Հետևողական լինելով սեփական արմատներին վերադառնալու ձգտմանը՝ դերսիմահայերը վստահեցնում են, որ նմանօրինակ ծրագրերը հետագայում էլ շարունակվելու են և լինելու ավելի լայնածավալ:
