Ստեփանակերտի «Դիզակ-պլյուս» տպարան ՍՊԸ-ի ընդհանուր գործունեության հիմքում օֆսեթ և լայնաֆորմատ տպագրությունն է:
«Դիզակ-պլյուս» տպարանն ընդլայնել է մատուցվող ծառայությունների շրջանակը
ՍՏԵՓԱՆԱԿԵՐՏ, ՀՈՒՆԻՍԻ 2, ԱՐՑԱԽՊՐԵՍ: «Արցախպրես»-ի թղթակցի հետ զրույցում ընկերության տնօրեն Դավիթ Բեգլարյանը տեղեկացրել է, որ տպարանում համապատասխան դիզայնով պատրաստվում և տպագրվում են գովազդային արտադրանք, պիտակներ, գրքեր, բուկլետներ, ձևաթղթեր և այլ տպագիր արտադրանք: Դ. Բեգլարյանի հաղորդմամբ` տպարանում տարեկան տպագրվում է 40-50 անուն գիրք՝ 250-500 օրինակով:
Գրքերի տպագրության հիմնական պատվիրատուն Արցախի գրողների միությունն է, ինչպես նաև անհատ գրողներ ու հասարակական այլ կազմակերպություններ: Տպարանում են լույս տեսնում նաև շուրջ 12 անուն թերթ ու ամսագիր:
Տնօրենը նշել է նաև, որ հանրապետության հիմնարկ-ձեռնարկությունների և գերատեչությունների գրեթե 90 տոկոսն օգտվում է տպարանի ծառայություններից: Անդրադառնալով իրենց կողմից առաջարկվող տպագրական ծառայությունների շահավետությանը՝ Դ. Բեգլարյանը հաղորդեց, որ դրա հիմքում ընկած են բարձր որակը, արագությունն ու գնային փոխշահավետ առաջարկը:
Խոսելով տպարանում ներդրված ժամանակակից ու նոր ծառայությունների մատուցման մասին` «Դիզակ պլյուս»-ի տնօրենը նշել է նաև ,որ այս տարի ճապոնական արտադրության համապատասխան սարքավորումներ ձեռք բերելու միջոցով հնարավորություն է ընձեռվել իրագործելու լայնաֆորմատ գովազդի տպագրություն:
Տեղում մասնագետների վերապատրաստումն իրականացրել են արտասահմանցի մասնագետները։ Այդպիսով, ներկայումս տպարանը կարողանում է պատրաստել քաղաքի տեսանելի վայրերում տեղադրվող գովազդային լայնաֆորմատ պաստառներ։ Բացի այդ, հուշանվերների, վերնաշապիկների և կահկարասիների վրա իրականացվում են նաև տպագրություններ։
Տնօրեն Դ. Բեգլարյանի հավաստմամբ` առաջիկա 5 տարիների ընթացքում տպարանում ներդվելու են ստվարաթղթե արկղերի արտադրության համար նախատեսված սարքավորումներ, ինչպես նաև` ավտոմատացված ֆլեքսո տպագրություն։
Ներկայումս տպարանը զինված է հիմնականում գերմանական, ինչպես նաև ճապոնական ժամանակակից սարքավորումներով, որոնք հնարավորություն են ընձեռում բարձրորակ տպագրական արտադրանք թողարկել:
Դ. Բեգլարյանի հաղորդմամբ` մեծ ձեռբերումներ են արձանագրել գունավոր տպագրության առումով: Նշված ձեռբերումների արդյունքում հաճախ Երևանից էլ են ունենում պատվերներ: Ըստ տնօրենի տեղեկատվության` տպարանը ներկայումս 40-50 աշխատատեղ է ապահովում, իսկ լայնաֆորմատ տպագրության հետ կապված ` ծրագրերի իրագործման արդյունքում լրացուցիչ ևս 8 աշխատատեղ էլ է տեղծվել:
