Այսօր Ստեփանակերտի մշակույթի և երիտասարդության պալատում Արցախի պետական պատմաերկրագիտական թանգարանի աջակցությամբ տեղի է ունեցել հայկական ճարտարապետությունն ուսումնասիրող (ՀՃՈւ) կազմակերպության նախագահ Սամվել Կարապետյանի «Եղեռն՝ եղեռնից հետո» խորագրով շրջիկ ցուցահանդեսի բացումը:
Ստեփանակերտում բացվել է «Եղեռն՝ եղեռնից հետո» խորագրով շրջիկ ցուցահանդես
ՍՏԵՓԱՆԱԿԵՐՏ, ՀՈՒՆԻՍԻ 8, ԱՐՑԱԽՊՐԵՍ: Բացման խոսքում Արցախի պետական պատմաերկրագիտական թանգարանի տնօրեն Մելանյա Բալայանը կարևորել է նման միջոցառումները և հույս հայտնել, որ դրանք շարունակական բնույթ կունենա: «Ակնհայտ է, որ այսօր շարունակվում են կազմակերպել միջոցառումներ` նվիրված Ցեղասպանությանը, և այդ ցուցահանդեսներում ակնհայտ ներկայացվում է Թուրքիայի ջարդարարական քաղաքականությունը»,- ասել է Մ. Բալայանը:
ԼՂՀ մշակույթի և երիտասարդության հարցերի նախարար Նարինե Աղաբալյանն էլ իր հերթին է շնորհակալություն հայտնել Ս. Կարապետյանին, նման հայրենանվեր գործ կատարելու համար: Ն. Աղաբալյանի խոսքով` այս ցուցահդեսը շատ կարևոր տեղեկատվություն է տալիս և մենք պարտավոր ենք այն փոխանցել մեր սերունդներին Այնուհետև Ս. Կարապետյանը առանձին-առանձին անդրադարձել է ցուցադրված նկարներին և մեկնաբանել նրանց նշանակությունը:
«Արցախպրես»-ի թղթակցի հետ զրույցում Ս. Կարապետյանը նշել է, որ նախատեսված է ցուցահանդես կազմակերպել նաև Իջևանում, Վանաձորում, Երևանում և Բրյուսելում: «Ցուցահանդեսին ներկայացված է թվով 32 պաստառ:
Շուտով լույս կտեսնի «Եղեռն՝ եղեռնից հետո» վերնագրով 384 էջանոց գիրքս»,- ասել է Ս. Կարապետյանը և հավելել, որ ցուցահանդեսի նպատակն է ներկայացնել, թե իրականում ինչ է տեղի ունեցել Թուրքիայում:
«Հոգու պարտք» հայրենագիտական ՀԿ նորաստեղծ կազմակերպության նախագահ Շողիկ Հովհաննիսյանը նշել է, որ ծրագիրը իրականացվել է ՀՀ նախագահի գործընկեր կազմակերպության՝ Հայաստանի երիտասարդական հիմնադրամի հայտարարած դրամաշնորհային մրցույթի շրջանակներում:
Ցուցահանդեսը կազմակերպել է «Հոգու պարտք» հայրենագիտական ՀԿ-ն հայկական ճարտարապետությունն ուսումնասիրող հիմնադրամի աջակցությամբ։ «Ցուցահանդեսը նվիրված է Արևմտյան Հայաստանի ամենակարևոր հուշարձաններին, որոնք դարեր շարունակ ոչնչացվել և ոչնչացվում են»,- նշել է Շ. Հովհաննիսյանը և ավելացրել, որ Հայոց ցեղասպանությունից հետո տեղի է ունեցել մշակութային ջարդ, դրա համար էլ ցուցահանդեսը վերնագրված է «Եղեռն` եղեռնից հետո»:
Ցուցահանդեսին ներկա էին նաև ԼՂՀ ԱԺ նախագահ Աշոտ Ղուլյանը, ԼՂՀ արտաքին գործերի նախարար Կարեն Միրզոյանը, կրթության և գիտության նախարար Սլավա Սարգսյանը,ԱԺ պատգամավորներ և արվեստասեր հասարակության այլ ներկայացուցիչներ: