Միացյալ Նահանգների Սենատի արտաքին հատկացումների հանձնաժողովը` հետևելով սենատոր Մարկ Քըրքի առաջարկին, վերահաստատել է իր շարունակական օժանդակությունը ԱՄՆ-ի կողմից Լեռնային Ղարաբաղին ուղղակի օգնության տրամադրմանը, ինչը նշանակում է, որ Սենատը կոչ է անում գործադիր իշխանությանը ֆինանսական օգնություն տրամադրել Արցախին 2016 թվականին:
Ինչքա՞ն գումար է Միացյալ Նահանգները հատկացրել Արցախին. վիճակագրություն
ՍՏԵՓԱՆԱԿԵՐՏ, ՀՈՒԼԻՍԻ 11, ԱՐՑԱԽՊՐԵՍ: Ինչպես Արտակ Բեգլարյանը գրում է իր բլոգում, ԱՄՆ-ն մարդասիրական օգնություն է տրամադրում Լեռնային Ղարաբաղի Հանրապետությանը` սկսած 1998 թվականից:
Կոնգրեսի որոշման մեջ ասվում է, որ հանձնախումբը աջակցում է հակամարտության խաղաղ կարգավորման միջոցների կիրառումը:
Կոնգրեսը պարտադրել է ԱՄՆ Միջազգային զարգացման գործակալությանը (ԱՄՆ ՄԶԳ) իրականացնել մարդասիրական օգնություն: Որոշ հասարակական կազմակերպություններ, ինչպիսիք են` «Բժիշկներ առանց սահմանների», «Ամերիկյան Կարմիր խաչ», «Հելո Թրաստ» և այլն, օգտագործել են այդ միջոցներ Արցախում մարդասիրական օգնության ծրագրեր իրականացնելու համար:
Ի դեպ, բացի Հայաստանից, ԱՄՆ-ն միակ երկիրն է, որն ուղղակի օգնություն է տրամադրում Լեռնային Ղարաբաղին:
Ի սկզբանե միջոցներ էր հատկացվում նաև Աբխազիային, սակայն 2009 թվականին Աբխազիայի անունը հանվել է ԱՄՆ-ի կողմից օգնություն ստացողների ցանկից, ինչը, ենթադրաբար, պայմանավորված է 2008 թվականի ռուս-վրացական պատերազմով: Այսպիսով, այս փաստը նույնպես վկայում է այն պնդման մասին, որ ի սկզբանե Կովկասի հակամարտությունների առումով, ԱՄՆ-ի կողմից տրամադրվող օգնությունը նախատեսված է եղել հիմնականում Լեռնային Ղարաբաղի համար:
Ստորև ներկայացնում ենք ԱՄՆ-ի ֆինանսական օգնությունը Լեռնային Ղարաբաղի Հանրապետությանը 1998- 2015 թվականներին՝ նշելով նաև, թե որքան է առաջարկել Կոնգրեսը և ինչքան է կազմել ԱՄՆ կառավարության կողմից ԼՂՀ-ին փաստացի տրամադրված գումարը:
Տարի Կոնգրեսի կողմից փաստացի նպատակ
1998թ. $12,500,000 $5,500,000 ------
1999թ. $7,500,000 $3,500,000 Վերակառուցման եւ խաղաղ կարգավորման համար
2000թ. - $2,000,000 Վերակառուցման եւ խաղաղ կարգավորման. համար
2001թ. - $4,000,000 Վերակառուցման եւ խաղաղ կարգավորման. համար
2002թ. - $2,000,000 Վերակառուցման եւ խաղաղ կարգավորման. համար
2003թ. $5,000,000 $2,000,000 ընթացիկ մարդասիրական կարիքներ
2004թ. $5,000,000 $2,000,000 Մարդասիրական օգնություն
2005թ. $3,000,000 $2,500,000 Մարդասիրական օգնություն
2006թ. $3,000,000 $3,000,000 Մարդասիրական օգնություն
2007թ. $3,000,000 $2,000,000 Վստահության միջոցներ
2008թ. $6,000,000 $2,000,000 Մարդասիրական օգնություն
2009թ. $8,000,000 $2,000,000 Մարդասիրական օգնություն
2010թ. $8,000,000 $2,000,000 Մարդասիրական օգնություն
2011թ. - $2,000,000 -
2012թ. - $2,000,000 -
2013թ. - $2,000,000 -
2014թ. - $2,000,000 -
2015թ. - $2,000,000 -
Ընդամենը՝ $44,500,000
1998-2010 թվականների տվյալները վերցրված են Հայ դատի հանձնախմբի «Լեռնային Ղարաբաղի ամերիկյան օգնության օրենսդիր պատմություն» փաստաթղթից, իսկ 2011-2015 թվականների տվյալները` լրատվամիջոցներից եւ անանուն հարցազրույցներից: