Անվանի օպերային երգչուհի, մանկավարժ, պրոֆեսոր Լյուբով Կազարնովսկայան Հայաստան այցը համարում է վերադարձ տուն:
Լյուբով Կազարնովսկայան խոստովանեց` սիրում է Հայաստանը
ՍՏԵՓԱՆԱԿԵՐՏ, օգոստոսի 27, ԱՐՑԱԽՊՐԵՍ-ԱՐՄԵՆՊՐԵՍ: «Ես Հայաստանում եմ մեծացել, հայրս այստեղ է ծառայել: Ես Չեխովի դպրոցում եմ սովորել, Աբովյան 32 հասցեում եմ ապրել: Հայաստանի երաժշտական մշակույթը, որի մասին երգել է Կոմիտասը, ես գիտեմ, մեծացել եմ դրա հետ, ինձ համար այստեղ այցը պատահական չէ: Ես հասկանում եմ այս երկիրը, սիրում, սերտ կապեր ունեմ Հայաստանի հետ», նշեց Լյուբով Կազարնովսկայան:
Անվանի երգչուհին սեպտեմբերի 1-ին Ստեփանակերտի Վերածննդի հրապարակում կայանալիք Ջուզեպե Վերդիի «Ռեքվիեմի» արցախյան պրեմիերայի կազմակերպիչներից է` նախագծի գեղարվեստական ղեկավարը: Փաստում է` ուրախ է, որ Արցախում նման նախագիծ է իրականացվում:
«Այն առաջին հերթին նվիրվում է Հայոց ցեղասպանությանը, մի կողմից` սարսափելի տարեթվի, մյուս կողմից` տարեթվի, որը մեզ մոտ հույս առաջացրեց: Մեծ Հայաստանի անկոտրում հոգի, անկոտրում մշակութային հոգի, ազգի վերածնունդ. այս ամենը «Ռեքվիեմ»-ն է: ՀՀ առաջին տիկին Ռիտա Սարգսյանի հետ նախորդ տարի քննարկել ենք, թե Ցեղասպանության տարելիցին ինչ անենք, որոշեցինք, որ «Ռեքվիեմից» բացի ավելի լավ բան չկա»,-նշեց նա:
Երգչուհու խոսքով, Արցախում հատկապես կարևոր է նման ծրագիր իրականացնել:
«Այնտեղ պետք է երջանկություն լինի, այնտեղ մարդիկ են ապրում, շատ երեխաներ կան, այնտեղ շատ մեծ սեր կա: Մարդիկ սպասում են այս տոնին: Արցախում «Ռեքվիեմ»-ը կհնչի հանուն խաղաղության, բարության և արդարության»,-նշեց Լյուբով Կազարնովսկայան:
Ամենայն հայոց մաեստրո Հովհաննես Չեքիջյանն էլ ուրախությամբ փաստեց, որ միջոցառման հեղինակներից մեկը Կազարնովսկայան է: «Շատ ուրախ եմ, որ մասնակցում ենք ոչ միայն արվեստով, այլև քաղաքական կեցվածքով»,-ընդգծեց նա
ՀՀ Նախագահի տիկին Ռիտա Սարգսյանի բարձր հովանու ներքո և ԼՂՀ մշակույթի և երիտասարդության հարցերի նախարարության աջակցությամբ, Վերդիի «Ռեքվիեմի» արցախյան պրեմիերային կմասնակցեն Հայաստանի ազգային ֆիլհարմոնիկ նվագախումբը (գեղարվեստական ղեկավար և գլխավոր դիրիժոր՝ Էդուարդ Թոփչյան), Հայաստանի ազգային ակադեմիական երգչախումբը (գեղարվեստական ղեկավար և գլխավոր դիրիժոր՝ Հովհաննես Չեքիջյան), Արցախի պետական «Վարարակն» (գեղարվեստական ղեկավար և խմբավար՝ Նինա Գրիգորյան) և Արցախի պետական «Մռակած» (գեղարվեստական ղեկավար և խմբավար՝ Մարինե Մեսրոպյան) կամերային երգչախմբերը: Միջոցառմանը հանդես կգան Յանա Սաֆոնովան (սոպրանո / Ռուսաստան), Վիշնիա Ռադոսավը (մեցցո սոպրանո / Սերբիա), Ալեքսանդր Չերնովը (տենոր / Ռուսաստան), Նիկոլա Ուլիվերին (բաս / Իտալիա):
Նախագծի հեղինակն է Սարինե Ավթանդիլյանը: Որպես դիրիժոր արցախյան պրեմիերայի ժամանակ հանդես կգա Անատոլի Լևինը: