Շուշիի Հակոբ Գյուրջյանի անվան ինստիտուտի նախաձեռնությամբ այսօր Ստեփանակերտի մշակույթի և երիտասարդության պալատում կայացել է Արցախի Հանրապետության վաստակավոր նկարիչ Սամվել Գաբրիելյանի հիշատակին նվիրված ցուցահանդեսի բացման արարողություն:
Ստեփանակերտում կայացել է Սամվել Գաբրիելյանի հիշատակին նվիրված ցուցահանդես
ՍՏԵՓԱՆԱԿԵՐՏ, նոյեմբերի 3, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ցուցահանդեսին բացման խոսքով հանդես է եկել Հակոբ Գյուրջյանի անվան ինստիտուտի ռեկտոր Յուրի Հովհաննիսյանը:
«Այս ցուցահանդեսում առկա է նկարչի հետևորդ ուսանողների աշխատանքները՝ նպատակ ունենալով այսպես արտահայտել իրենց յուրօրինակ հարգանքն ու մեծարանքը նկարչի հիշատակին»,- ասել է Յու. Հայրապետյանը և հավելել, որ ցուցահանդեսին ներկայացված ուսանողության տարբեր տեսակի աշխատանքները թվով 87-ն են, և բոլոր գործերում էլ երևում են Ս. Գաբրիելյանի ավանդը, ներդրումը, հորինվածքների ոճն ու խորությունը:
Ս. Գաբրիելյանի ուսանողուհի Արմինե Ավագիմյանը ընդգծել է, որ վարպետ-ուսուցչից, իրոք, իրենք շատ բան են սովորել: «Ամենակարևորն այն է, որ գեղանկարիչ լինելը ոչ թե մասնագիտություն է, այլ Բարձրյալի կողմից տրված կոչում: Այո´ իրական արվեստագետը միշտ պետք է հավատարիմ մնա իր արվեստին՝ նկարչի կոչմանը,- ասել է Ա. Ավագիմյանը և նշել.- որ նա հպարտ է, որ ճանաչել եմ Սամվել Գաբրիելյան մտավորականին»:
Նկարչի այրին՝ Անժելա Գաբրիելյանը, չկարողանալով զսպել հուզմունքը, ասել է. «Դժվար է հավատալ, որ նա մեզ հետ չէ:
Այս ցուցահանդեսն ապացուցում է, որ նա միայն ֆիզիկապես է բացակա: Սամվելը մոլեռանդորեն սիրահարված էր իր գործին, իր արվեստին և իր գիտելիքներն էլ սիրով փոխանցել է իր ուսանողներին՝ հիմնելով գաբրիելյանական իր դպրոցը»,- և ավելացրել, որ ցուցահանդեսն իսկական անակնկալ էր ընտանիքի անդամների համար:
Նկարչի մայր Նունե Գաբրիելյանը հպարտ է , որ իր վաղամեռիկ որդին հասցրել է Արցախ աշխարհն ու արցախցուն ներկայացնել ու ճանաչելի դարձնել շատ երկրների ժողովուրդների:
Այնուհետև ներկաները շրջել են պատկերասրահով՝ դիտելով Ս. Գաբրիելյանի հետնորդ նկարիչների աշխատանքների ցուցահանդեսը:
Միջոցառմանը ներկա էին ԼՂՀ նախագահ Բակո Սահակյանը, Ազգային ժողովի նախագահ Աշոտ Ղուլյանը, Մշակույթի և երիտասարդության հարցերի նախարար Նարիևե Աղաբալյանը, նկարչի հարազատները, ուսանողներ և այլք: