ԼՂՀ 2016 թվականի պետական բյուջեի նախագծով գյուղատնտեսության ծրագրերի իրագործման համար նախատեսվում է հատկացնել ավելի քան 3 միլիարդ դրամ գումար, ինչը ընթացիկ տարվա հատկացումներից ավել է 151 միլոն դրամով:
Արցախում տոհմային խոզաբուծության նոր ծրագիր է սկսվում. Եվրոպայից արդեն ներկրվել է խոզերի առաջին խմբաքանակը
ՍՏԵՓԱՆԱԿԵՐՏ, դեկտեմբերի 6, ԱՐՑԱԽՊՐԵՍ: Այս մասին ԼՂՀ 2016 թվականի պետական բյուջեի նախագծի խորհրդարանական քննարկման ժամանակ ասել է գյուղատնտեսության նախարար Արամ Մխոյանը:
Նրա խոսքով, ընթացիկ տարվա 150 մլն դրամի փոխարեն նախատեսվում է եկող տարի ենթաշրջանային զարգացման ծրագրերին նպատակաուղղել 100 մլն դրամ գումար, իսկ 50 մլն դրամը նախատեսվում է օգտագործել գյուղոլորտի զարգացման համար առաջնային ու առավել հասցեական ծրագրերի իրագործմանը: Ուշադրության կենտրոնում կպահվի ոռոգման ջրախնայողական նորագույն տեխնոլոգիաների ներդրումը, ինչի իրագործման համար կհատկացվի 160 մլն դրամ:
Գյուղի և գյուղատնտեսության աջակցության հիմնադրամին է հատկացվելու 820 մլն դրամ գումար:
Զգալի գումար է նախատեսվում գյուղմթերքների վերամշակման ոլորտի խթանման համար՝ շուրջ 600 մլն դրամի չափով: Եկող տարվանից չի գործի սև ցելի համար հողօգտագործողների աջակցության ծրագիրը, որի փոխարեն նախատեսվում է 330 մլն դրամի չափով գումար հատկացնել գարնանային մշակաբույսերի ցանքաշրջանառության զարգացման ծրագրին:
Կխրախուսվեն ջրախնայողական բազմամյա մշակաբույսերի աճեցմամբ զբաղվող հողօգտագործողները:
Պատասխանելով խոզաբուծության զարգացման համար նախատեսվող հատուկ ծրագրային կետի արդյունավետության մասին պատգամավորի հարցին՝ ոլորտի ղեկավարը նշել է, որ խոզաբուծությունը, չնայած հիվանդությունների առումով ռիսկայնությանը, անասնապահության արագ զարգացող ճյուղերից է:
«Պիլոտային ծրագրով նախատեսվում է հանրապետությունում խթանել տոհմային խոզաբուծությունը: Այդ նպատակով Եվրոպայից արդեն ներմուծել ենք խոզերի առաջին խմբաքանակը»,-ասել է նախարարը՝ հավելելով, որ ճյուղի զարգացման անհրաժեշտությունը ծագել է շուկայում խոզի մսի մեծ պահանջարկից:
Պատգամավորները գյուղնախարարին հարց են առաջադրել նաև գործող տոհմային կայանի՝ ինքնաֆինանսավորման անցնելու ժամկետների վերաբերյալ, ինչին ի պատասխան Ա. Մխոյանը հավաստիացրել է, որ այն ինքնաֆինանսավորման կանցնի 2 տարուց:
