Հայաստանում «Ֆեյսբուք»-ը չի դարձել թիվ մեկ սոցիալական ցանց. «Օդնոկլասնիկի»-ն շարունակում է մեր երկրում մնալ առաջատարի դիրքերում:
«Ֆեյսբուք»-ը դարձավ քաղաքացիական հասարակության զարգացման կարևոր գործիքներից մեկը
ՍՏԵՓԱՆԱԿԵՐՏ, փետրվարի 4, ԱՐՑԱԽՊՐԵՍ-ԱՐՄԵՆՊՐԵՍ: Այս մասին լրագրողների հետ զրույցում փետրվարի 4-ին նշել է տեղեկատվական անվտանգության փորձագետ Սամվել Մարտիրոսյանը:
«Ֆեյսբուք»-ի ղեկավարությունն անում է ամեն ինչ, որ այդ ցանցից դուրս չգանք: Մենք գործ ունենք մենաշնորհային տիրույթի հետ: Սոցիալական ցանցը բոլոր միջոցներով փորձում է մարդկանց պահել իր մեջ. աշխարհում ամենաշատ լուսանկարները «Ֆեյսբուք»-ում են, Youtube-ի հետ պայքար է գնում նաև տեսանյութերի հարթակի շուրջ»,-նշել է Սամվել Մարտիրոսյանը:
Նրա խոսքով` Հայաստանում «Ֆեյսբուք»-ից ևս ակտիվ օգտվում են:
«Օդնոկլասնիկի»-ն մեր երկրում օրական մեկ միլիոն ակտիվ այցելու ունի, իսկ «Ֆեյսբուք»-ում այցելուների թիվն օրական 560 հազարի է հասնում: 2010-ին այն ակտիվ հարթակ դարձավ Հայաստանում: «Ֆեյսբուք»-ն օգտագործվեց որպես քաղաքացիական հարթակ: Այդ ժամանակ գրանցված մոտ 50 հազար ակտիվ օգտատեր կար»,-շեշտեց Սամվել Մարտիրոսյանը` հավելելով, որ սոցիալական ցանցը դարձավ քաղաքացիական հասարակության զարգացման կարևոր գործիքներից մեկը:
Նրա խոսքով` բացասական ազդեցություններից մեկն այն է, որ մեր օգտատերն ինքնուրույն տեղեկատվություն չի փնտրում, ընկալում է այն, ինչ տեղադրում եք սոցիալական ցանցում:
«Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանի խոսքով` աշխարհում 1,5 միլիարդ մարդ ակտիվ օգտվում է «Ֆեյսբուք»-ից:
«Եթե մյուս ցանցերը գումարենք` 4 միլիարդի կհասնի: Միայն 2 միլիարդ նկար անցյալ տարի է «Ֆեյսբուք»-ում զետեղվել: Այն դարձել է մեր իրողության հայելին. դրական, բացասական կողմերն այնտեղ կան: Ամեն ինչ կարող ես «Ֆեյսբուք»-ում գտնել»,-շեշտեց նա:
Փետրվարի 4-ը «Ֆեյսբուք» սոցիալական ցանցի ստեղծման օրն է:
Այն ստեղծվել է 2004 թ. Մարկ Ցուկերբերգի կողմից։ Համահիմնադիրներն են Էդուարդո Սավերինը, Քրիս Հյուջսը և Դասթին Մոսկովիցը։ Սկզբնապես նախատեսված է եղել միայն Հարվարդի համալսարանի ուսանողների համար, այժմ էլեկտրոնային փոստի հասցե ունեցող ցանկացած անձ կարող է գրանցվել և օգտվել «Ֆեյսբուք»-ից։ Կայքը թարգմանված է ավելի քան 70 լեզվով, այդ թվում՝ հայերեն։