«Արցախի սոցիալական ծրագրերի հիմնադրամն» զոհված ազատամարտիկների զավակների, երկրորդ և երրորդ կարգի զինվորական հաշմանդամության կարգ ունեցողների, ինչպես նաև 4 և ավելի անչափահաս երեխաներ ունեցող բազմազավակ ընտանիքների համար իրականացնում է հիփոթեքային վարկերի կանխավճարների և տոկոսների լրիվ սուբսիդավորման պետական աջակցության ծրագիր:
«Արցախի սոցիալական ծրագրերի հիմնադրամ»ը հիփոթեքային վարկերի տոկոսների լրիվ սուբսիդավորման ծրագիր է իրականացնում
ՍՏԵՓԱՆԱԿԵՐՏ, փետրվարի 4, ԱՐՑԱԽՊՐԵՍ: Այդ մասին «Արցախպրես»-ի թղթակցի հետ զրույցում տեղեկացրել է «Արցախի սոցիալական ծրագրերի հիմնադրամ»-ի տնօրեն Մարատ Հասրաթյանը ՝ մանրամասնելով, որ նախկինում բնակարան գնելու, կառուցելու և վերանորոգելու համար վարկեր ստացած նշված սոցիալական կարգավիճակ ունեցողները, ովքեր նախկինում Արցախի ներդրումային հիմնադրամի մասնակի սուբսիդավորմամբ օգտվում էին պետական ֆինանսական աջակցությունից, այսուհետ կարող են դիմել և տեղափոխվել «Արցախի սոցիալական ծրագրերի հիմնադրամ», որտեղ կստանան հիփոթեքային վարկի տոկոսների ամենամսյա սուբսիդավորման երաշխավորագրեր :
Հիմնադրամի տնօրենի խոսքով՝ առաջնային հիփոթեքային վարկերի կանխավճարի և տոկոսադրույքների սուբսիդավորման համար հնարավորության դեպքում, ֆինանսավարկային համապատասխան կազմակերպությունների հետ կկնքվեն պայմանագրեր : Ներկայումս «Արցախբանկ»-ի, «Հայբիզնես» բանկի և «Ֆիդես» վարկային կազմակերպության հետ կնքվել են պայմանագրեր միայն գործող վարկերի համաձայն: Հիմնադրամում արդեն շուրջ 20 հայտ է գրանցվել, և մոտակա օրերին հայտատուներին կտրամադրվեն ամենամսյա տոկոսադրույքի լրիվ սուբսիդավորման երաշխավորագրեր: