Այսօր Ստեփանակերտի Վիտալի Ջհանգիրյանի անվան N 11 ավագ դպրոցում տեղի է ունեցել ուսումնական տարվա ավարտը եզրափակող Վերջին զանգի տոնական արարողություն:
Արցախի բոլոր հանրակրթական դպրոցներում հնչել է Վերջին զանգի ղողանջները (լուսանկարներ)
ՍՏԵՓԱՆԱԿԵՐՏ, 24 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` դպրոցն այս տարի թողարկել է 210 շրջանավարտ:
Վերջին զանգին նվիրված հանդիսավոր միջոցառումը մեկնարկել է Արցախի Հանրապետության դրոշի ներսբերմամբ և պետական օրհներգի հնչեցմամբ:
Այնոհետև ներկաները մեկ րոպե լռությամբ հարգել են Արցախյան ազատամարտի և ապրիլյան պատերազմի ընթացքում, հայրենիքի պաշտպանության համար նահատակված զինվորների հիշատակը:
Շրջանավարտներին իր շնորհավորական խոսքն է հղել ԼՂՀ վարչապետ Արայիկ Հարությունյանը:
«Սիրելի՛ շրջանավարտներ, այս հիշարժան տոնի առթիվ շնորհավորելով ձեզ՝ պատգամում եմ, որ երբեք չմոռանաք ձեր հայրենիքը, պատրաստ լինեք նրա պաշտպանությանը, շենացմանն ու բարգավաճմանը նվիրվելուն: Հիշեցե՛ք, կյանքի բոլոր էտապներում մեր բոլոր հաջողությունների համար մենք պարտական ենք մեր Հայրենիքին: Հայրենիքն է, որ հոգատար ծնողի պես սիրում ու փայփայում է մեզ, հոգում մեր մասին: Երկրի շենացումը սկսում է ընտանիքից և սերմնավորվում դպրոցում՝ ձեր ուսուցիչների տված գիտելիքներով: Համոզված եմ, որ դպրոցից սկսվող Վերջին Զանգի ղողանջները նոր ազդակ են լինելու կյանքի դժվարին ճանապարհին նորանոր բարձունքներ հաղթահարելու համար: Կցանկանայի, որ մասնագիտական ինչ կողմնորոշում էլ ընտրեք, ձեզ վրա պատվով կրեք Արցախի արժանի զավակ լինելու կոչումը: Եղե՛ք մեր հայրենիքի արժանի զավակներ, իմացե՛ք, որ հայոց աշխարհին պետք են ուսյալ, խելացի ու բանիմաց մարդիկ: Համոզված եմ՝ դուք եք լինելու Ավարայրի, Սարդարապատի, Շուշիի, ապրիլյան ազատամարտի արժանի հետնորդները՝ պատրաստ ամեն րոպե կրկնել ձեր հայրերի ու եղբայրների սխրանքները: Շնորհավորում եմ ձեզ Վերջին զանգի կապակցությամբ. թո՛ղ այն հնչի որպես նոր և հասուն կյանքի սկիզբն ազդարարող մեկնարկ: Բարի երթ ձեզ դեպի նոր կյանք, դեպի նոր բարձունքների նվաճում»:
ԼՂՀ կրթության, գիտության և սպորտի նախարար Սլավա Ասրյանը ևս, շնորհավորելով շրջանավարտներին, ասել է. «Այսօր դուք ամփոփում եք` տարիներով ձեռք բերած գիտելիքները` յուրովի հիշելով ուսումնառության տարիների այն պահերը, որոնք անմոռաց կմնան ձեր ողջ կյանքի ընթացքում: Այսօրվանից նոր էջ է բացվում ձեր կյանքում. դուք ապագա մասնագիտական ընտրություն կատարելու շեմին եք: Շարունակեցեք ձեր կյանքի ուղին` ձեռք բերելով կյանքի հմտություններ, մասնագիտական գիտելիքներ, որ կարողանաք այն օգտագործել մեր հայրենիքի կառուցման ու զարգացման գործում: Վերջին տարիներին նկատվում է ուսման գործի նկատմամբ աշակերտների լուրջ մոտեցումներ, որոնք ակնառու են առարկայական օլիմպիադաների, ինտելեկտուալ խաղերի, սպորտի բնագավառում ինչպես նաև գերատեսչական ստուգումների արդյունքներից: Ձեզ բարի երթ»:
«Ես ևս միանում եմ հնչած բոլոր բարեմաղթանքներին ,-ասել է ԼՂՀ գլխավոր դատախազ Արթուր Մոսիյանը:- Դպրոցում ստացած ձեր գիտելիքները դուք կարողացեք ճիշտ օգտագործել կյանքում: Ինչ նվաճումների էլ որ հասնեք, պարտավոր եք հիշել, որ այն ձեռք եք բերել հայրենի կրթօջախում: Ինչ ձեռքբերումներ էլ կյանքում ունենաք, հիշեցեք որ գլխավորը հայրենիքի արժանի զավակ լինելն է: Դուք անկախության սերունդն եք, և ձեզ է վիճակված պահելու և պաշտպանելու մեր հայրենիքը ու շենացնելու այն»:
Իսկ N զորամասի հրաձգային գումարտակի հրամանատար, մայոր, ապրիլյան իրադարձությունների կենդանի հերոս Էդիկ Մալոյանն իր հրամանատարության և անձամբ իր անունից, սրտանց շնորհավորելով շրջանավարտներին, իր խոսքում նշել է. «Մենք միշտ ապահովելու ենք ԼՂՀ խաղաղությունը, որ երբևէ չխաթարվի ձեր անդորրը, ու դուք կարողանաք նվիրվել կրթությանը, գիտությանը, արվեստին, սպորտին, մեր երկրի բարգավաճման գործին: Բարի երթ ձեզ դեպի նոր կյանք, հորիզոններ»:
Միջոցառմանը շրջանավարտները հանդես են եկել շնորհակալական ջերմ խոսքերով, հայրենասիրական երգերով ու ազգագրական պարերով:
Հանդիսավոր արարողությանն առանձին շուք է տվել դպրոցական ավանդական վալս-պարը:
Միջոցառմանը ներկա էին նաև ԼՂՀ պաշտպանության նախարարի տեղակալ, գեներալ-մայոր Սամվել Կարապետյանը, ԼՂՀ պաշտոնատար անձինք, աշակերտներ, ծնողներ , հյուրեր և այլք: