6 ամիս առաջ էինք ամուսնացել: Իր զոհվելուց հետո ես վատացա, ինձ տարան հիվանդանոց, իմացա, որ առաջնեկիս եմ սպասում
Եթե տղա ծնվի հայրիկի անունն է կրելու. զոհված զինծառայողը չգիտեր, որ առաջնեկի է սպասում
ՍՏԵՓԱՆԱԿԵՐՏ, 28 մայիսի, ԱՐՑԱԽՊՐԵՍ: Այս մասին NEWS.am-ին պատմել է Գեղամի զինծառայող կինը՝ Անուշ Հյուսնունցը, որն այսօր՝ մայիսի 28-ին, ՀՀ նախագահական նստավայրում էր՝ ստանալու ամուսնուն հետմահու շնորհված «Արիության մեդալը»:
Գեղամն ու Անուշը ծանոթացել են ծառայության ընթացում:
Անուշն ամուսնուն վերջին անգամ տեսել է ապրիլի 1-ի կեսօրին:
«Ես հերթապահության էի, ինքը եկավ ինձ մոտ, խոսեցինք, գնաց: Երեկոյան զանգեց, ասեց, որ պիտի գնան առաջնագիծ: Դրանից հետո զրույցել եմ իր հետ ամսի 3-ի առավոտյան: Իմ մասին էր մտածում, ասում էր՝ դուրս չգաս, մի վախեցի, ամեն ինչ լավ կլինի»,- պատմեց Անուշը՝ նշելով, որ ամուսնու զոհվելու մասին իրեն ասել են հաջորդ օրը՝ ապրիլի 4-ին. «Ինձ ասացին, որ վիրավոր է, բայց փաստորեն մահացել էր, հաջորդ օրն իմացա»:
Գեղամը մեծ նպատակներ ուներ կապված ընտանիքի ապագայի հետ: Անուշը որոշել է՝ եթե որդի ունենա, ամուսնու անունով է կոչելու:
Գեղամ Խաչատրյանը զոհվել է ապրիլի 3-ին Թալիշի դիրքերում: