Ռումինիայի արտգործնախարարությունը, արձագանքելով երկրում ՀՕՊ համակարգ տեղակայելու վերաբերյալ ռուսական կողմից հնչող մտահոգություններին, հայտարարել է, որ այն ուղղված չէ ՌԴ-ի դեմ, այլ արվում է Ռումինիայի և ԱՄՆ-ի միջև կնքված համաձայնագրի հիման վրա և ունի բացառապես պաշտպանական բնույթ:
Ռումինիայում ՀՕՊ համակարգի տեղակայումը Ռուսաստանի դեմ ուղղված քայլ չէ. Ռումինիայի ԱԳՆ
ՍՏԵՓԱՆԱԿԵՐՏ, 28 մայիսի, ԱՐՑԱԽՊՐԵՍ: Այս մասին տեղեկացնում է РИА Новости գործակալությունը։
Ավելի վաղ Մոսկվան բազմիցս հայտարարել էր, որ ԱՄՆ-ի ու ՆԱՏՕ-ի գործողությունները՝ Եվրոպայում ՀՕՊ համակարգ տեղակայելու առումով, սպառնալիք են ՌԴ անվտանգության համար և կարող են խախտել տարածաշրջանում ռազմավարական կայունությունը։
Ռուսական կողմը նշել է, որ ՀՕՊ համակարգի տեղակայումը Արևելյան Եվրոպայում ԱՄՆ-ի միջուկային ռազմավարական հնարավորությունների մի մասն է։
Այսօր տարածած հաղորդագրության մեջ Ռումինիայի արտգործնախարարությունը հիշեցրել է, որ իրենք ու իրենց դաշնակիցները բազմիցս հայտարարել են, որ «հակահրթիռային համակարգը բացառապես պաշտպանական բնույթ ունի»։ Գերատեսչությունը կարծում է, որ ռուսական կողմի դիրքորոշումը ցույց է տալիս «իրական իրադրության անտեսումը»։
Գերատեսչությունից հավաստիացրել են, որ Ռումինիայում ՀՕՊ համակարգի տեղակայումը ուղղված չէ ո՛չ Ռուսաստանի դաշնության, ո՛չ որևէ այլ պետության դեմ։
«Այդ փաստերի խեղաթյուրումը միայն լարում է մթնոլորտը, ինչը հակասում է Ռումինիայի և նրա դաշնակիցների կողմից դրսևորվող անկեղծությանը»,-ասել են Ռումինիայի արտգործնախարարությունից։