Հաքերների խումբը ներդրվել է Վրաստանի տարածքով ադրբեջանական գազը Թուրքիա փոխադրող գազատարի համակարգում եւ փոխել «երկնագույն վառելիքի» հոսքի ուղղությունը դեպի Ռուսաստան:
Հաքերային գրոհի հետևանքով ադրբեջանական գազը Թուրքիայի փոխարեն հոսել է Ռուսաստան
ՍՏԵՓԱՆԱԿԵՐՏ, 8 հունիսի, ԱՐՑԱԽՊՐԵՍ: Այս մասին «Պրավո» հրատարակությանը հայտնել է Չեխիայի Հանրապետության կիբեռանվտանգության հայեցակարգի հեղինակ Ալես Շպիդլան` չնշելով, թե երբ է դա տեղի ունեցել:
Նրա խոսքով` համակարգի աշխատանքը վերականգնելու համար անհրաժեշտ է եղել երկու շաբաթ:
Շպիդլան նշել է, որ այլ երկրների գաղտնի փաստաթղթերը ձեռք բերելու համար գերտերությունները մասշտաբային կիբեռգրոհներ են կազմակերպում եւ միաժամանակ հետազոտում հաքերային գրոհների միջոցով այդ պետություններում քաոս ստեղծելու հնարավորությունները:
Որպես օրինակ նա նշում է Չինաստանը, որի մասնագիտացած կիբեռբանակը 50 հազարից ավելի մարդ ունի: Շպիդլան նաեւ հայտարարել է, որ մասշտաբային կիբեռգրոհների կազմակերպմամբ զբաղվում է նաեւ Ռուսաստանը՝ նշելով, որ դրա համար Վորոնեժում գործում է 12 հազար անձնակազմով մասնագիտացած կենտրոն:
Նրա խոսքով` կիբեռգրոհների միջոցով կարելի է կաթվածահար անել պետական ինստիտուտների աշխատանքը, ինչի համար բավական է, օրինակ, արգելափակել դրամական փոխանցումների համակարգը:
Ադրբեջանական ԶԼՄ-ները հայտնում են, որ դա Ադրբեջանի էներգետիկ ենթակառուցվածքի վրա հաքերային գրոհների առաջին դեպքը չէ: Վերջերս պարզվել էր, որ Բաքու-Թբիլիսի-Ջեյհան նավթատար խողովակաշարում պայթյունը, որը տեղի էր ունեցել 2008 թվականի օգոստոսին Վրաստանում ռուսաստանյան ռազմական միջամատության նախօրյակին, կատարվել էր հաքերային գրոհի միջոցով: