Այսօր Ստեփանակերտի «Վալլեքս Գարդեն» հյուրանոցի կոնֆերանսների դահլիճում կայացել է կայացել է Երևանի «Կովկաս» ինստիտուտի փոխտնօրեն, քաղաքագետ Սերգեյ Մինասյանի` «Զսպումը Ղարաբաղյան հակամարտության մեջ» մենագրության շնորհանդեսը:
Ստեփանակերտում կայացել է «Զսպումը Ղարաբաղյան հակամարտության մեջ» մենագրության շնորհանդեսը
ՍՏԵՓԱՆԱԿԵՐՏ, 27 հունիսի, ԱՐՑԱԽՊՐԵՍ: Բացման խոսքում մենագրության գիտական խմբագիր, «Կովկաս» ինստիտուտի տնօրեն , քաղաքագետ Ալեքսանդր Իսկանդարյանը նշել է, որ գրքում ուսումնասիրվել են Ղարաբաղյան հակամարտության զսպման ինչպես քաղաքական-դիվանագիտական այնպես էլ` ռազմական զսպման մեխանիզմները: Ըստ խմբագրի` մենագրության առանձնահատկությունը պետք է դիտարկել` որպես գիտական վերլուծություն ներսից, քանի, որ նման աշխատանքներ հրապարակվել են միայն արտասահմանյան քաղաքագիտական շրջանակների կողմից: Գիրքը գրվել է ռուսերեն, որպեսզի հասանելի լինի միջազգային հանրության լայն շրջանակների` մասնավորապես ԱՊՀ երկրների ընթերցողների համար` չնայած այն ակադեմիական բնույթի է և ներկայացնում է մասնագետների հետաքրրությունները : Ալ. Իսկանդարյանը կարևորել է հակամարտությունում առկա խնդիրները էմոցիոնալ դաշտից ռացիոնալի բերելու միտումը, որն առկա է աշխատությունում:
Մենագրության հրատարակումը իրականություն է դարձել Կովկասում Շվեյցարական ակադեմիական ցանցի աջակցությամբ, որի ներկայացուցիչ Նիկոլյա Հայոյի կարծիքով գիտական նման հետազոտությունները նպատակաուղղված են ժողովրդավարության ամրապնդմանը: Հատկապես, երբ նման հետազոտությունները ներսից են արվում: Նրա խոսքով եթե նման հետազոտություններ լինեին նաև Ադրբեջանում, ապա այնտեղ ժողովրդավարության առումով մեծ հաջողություններ կարող էին արձանագրվել:
Քաղաքական գործիչ Մասիս Մայիլյանը, ով ամբողջությամբ ծանոթ է մենագրության բովանդակությանը , նկատել է, որ այն ընթերցելիս պարզ է դառնում, որ հայ ռազմադիվանագիտական շրջանակների կողմից արդեն իսկ կիրառվում են զսպման այն մեխանիզմները, որոնք ներկայացվում են Ս. Մինասյան տեսության մեջ։ Գրքի հեղինակ Սերգեյ Մինասյանի խոսքով Ղարաբաղյան հակամարտության մեջ զսպումը պետք ներառի ռազմական և քաղաքական-դիվանագիտական բաղադրիչների սերտ կոմբինացիա: Իհարկե , երբ Ադրբեջանը, որը դժգոհ է ստատուս-քվոյից և պարբերաբար նախաձեռնում է ռազմական գործողություններ, ապա նման իրավիճակում գերակշռում է ռազմական զսպման բաղադրիչը և հայկական կողմը ձեռնարկում է իրավիճակային զսպման միջոցներ: Քաղաքագետն ընդգծել է, որ զսպումը դեռևս հակամարտության կարգավորում չէ: Ստատուսի հարցը շարունակելու է մնալ ելակետային: Սակայն եթե հայկական կողմը կարողանա բոլոր ռեսուրսներով, զսպել ու երկարատև դիմակայություն ցուցաբերել, ապա կստանա ամեն ինչ:
Շնորհանդեսին ներկա էին ԼՂՀ Ազգային ժողովի պատգամավորներ, քաղաքագետներ, դասախոսներ և հասարակական կազմակերպությունների ներկայացուցիչներ: