ԼՂՀ Ազգային ժողով մուտք է գործել 1143 գրություն, որից 193-ը քաղաքացիների կողմից ստացված դիմումներն են եղել:
Քաղաքացիների կողմից ԼՂՀ Ազգային ժողով մուտք է գործել 193 գրություն
ՍՏԵՓԱՆԱԿԵՐՏ, 30 հունիսի, ԱՐՑԱԽՊՐԵՍ: Այդ մասին այսօր կայացած ԼՂՀ 6-րդ գումարման Ազգային ժողովի 3-րդ նստաշրջանի եզրափակիչ լիագումար նիստում ասել է ԱԺ նախագահ Աշոտ Ղուլյանը՝ ներկայացնելով խորհրդարանի գործունեության վերաբերյալ տարեկան հաղորդումը: ԱԺ նախագահի հաղորդմամբ՝ խորհրդարան-ընտրող կապն արտահայտվել է ինչպես ընդունելությունների, անձնական հանդիպումների, պատգամավորական այցերի, այնպես էլ՝ քաղաքացիների գրավոր դիմումների և Ազգային ժողովի կողմից դրանց ընթացքավորման տեսքով։ «Դիմումներում բարձրացված հարցերը հիմնականում սոցիալական բնույթի են: Դրանց մեծ մասը լուծում է ստացել, իսկ որոշ մասն ընթացքի մեջ է»,- մանրամասնել է Ա. Ղուլյանը:
Անդրադառնալով Ազգային ժողովի օրենսդրական գործունեությանը ԱԺ նախագահը նշել է, որ ԼՂՀ 6-րդ գումարման Ազգային ժողովի 3 նստաշրջանում, ընդհանուր առմամբ, գումարվել է Ազգային ժողովի 14 լիագումար նիստ, ինչպես նաեւ՝ 1 արտահերթ նստաշրջան ու 1 արտահերթ նիստ: Հաշվետու ժամանակահատվածում խորհրդարանն ընդունել է 64 օրենք՝ այդ թվում արտաքին հարաբերությունների հանձնաժողովի կողմից 1, արտադրության եւ արտադրական ենթակառուցվածքների հարցերի՝ 6, գիտության, կրթության, մշակույթի, երիտասարդության եւ սպորտի հարցեր՝ 4,պաշտպանության, անվտանգության եւ օրինապահպանության հարցերի՝ 1, պետական-իրավական հարցերի՝ 10, սոցիալական և առողջապահության հարցերի՝ 7, ֆինանսաբյուջետային եւ տնտեսական կառավարման հարցերի՝ 35։
Օրենսդրական նախաձեռնությունների ընդհանուր թիվն 80-ն է եղել, որից 7-ը պատգամավորներինն է, 73-ը` կառավարությանը: Խորհրդարանն իրականացրել է Սահմանադրությամբ իրեն վերապահված գործառույթներ՝ նշանակելով ԼՂՀ արդարադատության խորհրդի երկու իրավաբան անդամ (23 դեկտեմբերի, 2015թ.) և ԼՂՀ մարդու իրավունքների պաշտպան (5 մայիսի, 2016թ.):
Ամփոփելով առաջին աշխատանքային տարին՝ Ազգային ժողովի նախագահ Ա. Ղուլյանը նշել է, որ այս ընթացքում ամբողջությամբ բացահայտվել են նոր գումարման խորհրդարանի ուժեղ և թույլ կողմերը: «Բոլոր հիմքերն ունենք վերացնելու այդ բացթողումները եւ ամրապնդելու խորհրդարանի ուժեղ հատկանիշները»,-եզրափակել է ԱԺ նախագահը: