ԵԱՀԿ գործող նախագահի անձնական ներկայացուցչի թիմի ընդլայնման աշխատանքները ճշգրտման փուլում են:
ԵԱՀԿ գործող նախագահի անձնական ներկայացուցչի թիմի ընդլայնման աշխատանքները ճշգրտման փուլում են. Անջեյ Կասպրչիկ
ՍՏԵՓԱՆԱԿԵՐՏ, 1 հուլիսի, ԱՐՑԱԽՊՐԵՍ: Tert.am-ի հետ զրույցում այս մասին ասաց ԵԱՀԿ գործող նախագահի անձնական ներկայացուցիչ Անջեյ Կասպրչիկը: Վերջինս նշեց, որ ժամկետներ չի կարող ասել՝ երբ կլինի գրասենյակի ընդլայնումը, միայն ասաց, որ դա կախված է դետալներից:
- Վիենայում ԵԱՀԿ Մինսկի խմբի ջանքերով տեղի ունեցած Սերժ Սարգսյան-Իլհամ Ալիև հանդիպման արդյունքում ձեռք բերվեց պայմանավորվածություն, ըստ որի՝ ԵԱՀԿ գործող նախագահի անձնական ներկայացուցչի թիմն ընդլայնվելու է: Խոսքը հենց Ձեր թիմի մասին է: Ի՞նչ փուլում է այս գործընթացը:
- Հարցը գտնվում է ճշգրտման փուլում:
- Մոտավորապես ե՞րբ կլինի թիմի ընդլայնումը:
- Երբ լինեն ճշգրտումները, իսկ ճշգրտումները դեռ ընթացքի մեջ են:
- Պարո՛ն Կասպրչիկ, ինչի՞ց է կախված ճշգրտման ընթացքը: Կարծիքներ կան, որ այս հարցում Ադրբեջանի կողմից խոչընդոտներ են ստեղծվել:
- Չեմ կարծում, որ մեծ ժամանակ կպահանջի… Կախված է դետալներից:
- ՀՀ ԱԳ նախարարը Սանկտ Պետերբուրգի հանդիպումից հետո հայտարարեց, որ Ադրբեջանն, ըստ էության, խոչընդոտում է ԵԱՀԿ-ում թիմի ընդլայնման բյուջեի հաստատմանը:
- Ես արդեն ասացի, որ հարցը գտնվում է ճշգրտման փուլում:
- Թիմի ընդլայնումը ի՞նչ է փոխելու Լեռնային Ղարաբաղի հակամարտության կարգավորման գործում:
- Ես ուզում եմ մասնավորեցնել, որ չեն մեծանում իմ լիազորությունները, մեծանում է իմ թիմը, քանակը… Գրասենյակն է ընդլայնվում:
- Որքա՞ն բյուջե է անհրաժեշտ գրասենյակի ընդլայնման համար:
- Քննարկվում է դեռ:
- Իսկ հետաքննող մեխանիզմների տեղադրումը ե՞րբ կլինի:
- Այդ հարցը կապված չէ իմ գրասենյակի ընդլայնման հետ: Ես անմիջականորեն չեմ զբաղվում այդ հարցով, ուստի չեմ կարող պատասխանել: Այդ հարցով զբաղվում է ԵԱՀԿ քարտուղարությունը, ԵԱՀԿ Մինսկի խումբը: