Անկարան հույս ունի ավելացնել առևտրաշրջանառությունը Ռուսաստանի հետ՝ հասցնելով տարեկան 100 մլրդ դոլարի։
Անկարան հույս ունի ՌԴ-ի հետ առևտրաշրջանառությունը հասցնել տարեկան 100 մլրդ դոլարի. Չավուշօղլու
ՍՏԵՓԱՆԱԿԵՐՏ, 1 հուլիսի, ԱՐՑԱԽՊՐԵՍ: Այդ մասին հայտնել է Թուրքիայի արտգործնախարար Մևլութ Չավուշօղլուն:
Սոչիում ՌԴ արտգործնախարար Սերգեյ Լավրովն այսօր հանդիպելու է իր թուրք գործընկեր Չավուշօղլուի հետ՝ Սևծովյան տնտեսական համագործակցության կազմակերպության արտգործնախարարների նիստի շրջանակներում:
Այդ բանակցությունների նախօրեին Մևլութ Չավուշօղլուն ռուս-թուրքական հարաբերությունների հեռանկարների մասին հոդված է գրել «Коммерсантъ»-ի համար:
Ըստ նրա՝ Թուրքիայի և Ռուսաստանի հարաբերությունները միշտ էլ եղել են միջազգային օրակարգում հատուկ ուշադրության կենտրոնում:
Հարաբերությունների խզումը, որը հետևեց 2015 թվականի նոյեմբերի 24-ին տեղի ունեցած ողբերգությանը (երբ թուրքական օդուժը խոցեց ռուսական ռմբակոծիչը-Խմբ.), անդրադարձավ միլիոնավոր մարդկանց վրա: Հարված հասցվեց երկու երկրների տնտեսություններին, դժվարին դրության մեջ հայտնվեցին շատ ընտանիքներ:
«Մենք բոլոր հնարավորություններն ու պոտենցիալն ունենք, որպեսզի համատեղ ջանքերով այդ թիվը հասցնենք 100 մլրդ դոլարի, քանի որ մեր երկրների տնտեսությունները փոխլրացնում են միմյանց»,- գրել է նա:
Չավուշօղլուն նշել է, թե այսօր իրենց մարտահրավերն են համարում ռուս-թուրքական հարաբերությունների զարգացումը՝ բարեկամության ու համագործակցության ուղղություններով, այլ ոչ դիմակայությունը:
«Համոզված եմ, որ երկու կողմերի համար կա տնտեսական, սոցիալական, մշակութային նախադրյալների հիմք»,-ընդգծել է նա: