Այսօր Ծաղկաձորում 13-րդ անգամ անցկացվեց Հայաստանի հանրապետության Նախագահի մրցանակի համար «Լավագույն մարզական ընտանիք-2016» ամենամյա մրցույթը, որը Հայաստանի և Արցախի հանրապետությունների քաղաքացիների շրջանում լավագույն ավանդույթ է դարձել։
Ծաղկաձորում անցկացվեց «Լավագույն մարզական ընտանիք-2016» ամենամյա մրցույթը
ՍՏԵՓԱՆԱԿԵՐՏ, 23 հուլիսի, ԱՐՑԱԽՊՐԵՍ: «Լավագույն մարզական ընտանիք-2016» մրցույթն անցկացվում է ընտանիքնեի միջև, որոնց յուրաքանչյուրի թիմը բաղկացած է երեք հոգուց՝ հայրը, մայրը և ընտանիքի մեկ երեխան: Մրցույթն անցկացվում է երեք փուլով: Առաջին փուլը տեղի է ունեցել հունիսի 1-ից հունիսի 15-ն ընկած ժամանակահատվածներում՝ ՀՀ 42 քաղաքներում և ԼՂՀ 7 վարչական շրջաններում: Երկրորդ փուլն անցկացվել է հունիսի 18-ից մինչև հուլիսի 5-ը, իսկ երրորդ՝ եզրափակիչ փուլն անցկացվել է հուլիսի 18-ից մինչև 23-ը՝ Ծաղկաձորի գլխավոր մրզահամալիրում։
Մրցույթի կազմակերպիչ և գլխավոր պատասխանատու Խաչիկ Ասրյանը լրագրողների հետ զրույցում ասաց, որ «Լավագույն մարզական ընտանիք» մրցույթի բյուջեն կազմում է 114 մլն 345 հազ. դրամ, «Լավագույն մարզական նախադպրոցական հիմնարկ» մրցույթի բյուջեն կազմում է 19 մլն 574 հզր. դրամ, «Հաշմանդամություն ունեցող լավագույն մարզիկ» մրցույթի բյուջեն կազմում 16 մլն 945 հազ. դրամ, իսկ «Երեխաների խնամքի և պաշտպանության լավգույն մարզական հաստատություն» մրցույթի բյուջեն կազմում է 4 մլն 975 հազ. դրամ:
Նախքան պարգևատրման մեկնարկը մրցույթի մասնակիցներն ու ներկաները մեկ րոպե լռությամբ հարգեցին հայոց պետականության սահմանները անառիկ պահած և մարտիրոսված տղաների հիշատակը:
Վեց տարբեր մարզաձևերից առաջին հորիզոնականը գրավված 24 ընտանիքներ պարգևատրվեցին հավաստագրերով և յուրաքանչյուրը 100 000-ական դրամ գումարով:
Ավանդույթի համաձայն՝ ՀԱՕԿ նախագահ Գագիկ Ծառուկյանի կողմից 100 000-ական դրամով պարգևատրվեցին յուրաքանչյուր տարիքային խմբի ամենափոքր մասնակիցները։
Չորս տարիքային խմբերում և հաշմանդամություն ունեցող ընտանիքների միջև երրորդ, երկրորդ և առաջին հորիզոնականները գրաված ընտանիքները համապատասխանաբար պարգևատրվեցին, 300 000, 400 000 և 500 000-ական դրամով, վկայագրերով, հուշամեդալներով, իսկ ընտանիքների երեխաներին տրվեցին նաև հուշամեդալներ:
Առաջին տարիքային խմբում առաջին տեղը գրավեց Բուդաղյանների ընտանիքը՝ Երևանից, երկրորդ տարքային խմբում առաջին տեղը գրավեց Աղասյանների ընտանիքը՝ Կոտայքի մարզից, երրորդ տարիքային խմբում առաջին տեղը գրավեց Ուդումյանների ընտանիքը՝ Կոտայքի մարզից, չորրորդ տարիքային խմբում առաջին տեղը գրավեց Ալեքսանյանների ընտանիքը Շիրակի մարզից։
Հաշմանդամություն ունեցող ընտանիքներից առաջին տեղը գրավեց Նազարյանների ընտանիքը՝ Լոռու մարզից:
Եզրափակչում ՀՀ սպորտի և երիտասարդության նախարար Գաբրիել Ղազարյանը գավաթով պարգևատրեց չորս տարիքային խմբերում առավել միավորներ հավաքած ընտանիքներին՝ ՀՀ-ի, ԼՂՀ-ի և ՀՀ մարզերի պատվիրակություններին։
Եզրափակչում առավել միավորներ հավաքած մրցույթի ընդհանուր հաշվարկով երրորդ տեղը զբաղեցրեց Շիրակի մարզը և գավաթը ստացավ Շիրակի մարզպետ Հովսեփ Սիմոնյանը, երկրորդ տեղը գրավեց Կոտայքի մարզը և գավաթն ստացավ մարզպետ Կարապետ Գուլոյանը, առաջին տեղում Երևանն էր, գավաթը ստացավ քաղաքապետ Տարոն Մարգարյանը։
Մրցույթի մասնակից բոլոր ընտանիքների երեխաները ՀՀ նախագահ Սերժ Սարգսյանի անունից պարգևատրվեցին հուշանվերներով: