Արցախում ընթացիկ տարվա հուլիսի 23-25-ը, արդեն 7-րդ անգամ, կազմակերպվել և անց է կացվել ամառային ընտանեկան ճամբար՝ Ասկերանի շրջանի Պատարա գյուղի հարակից տարածքում:
Արցախում անց է կացվել ընտանեկան ամառային ճամբար
ՍՏԵՓԱՆԱԿԵՐՏ, 25 հուլիսի, ԱՐՑԱԽՊՐԵՍ: «Արցախպրես»-ի հաղորդմամբ՝ ԼՂՀ մշակույթի և երիտասարդության հարցերի նախարարության նախաձեռնությամբ կազմակերպված «Ընտանեկան ճամբար-2016»-ին այս տարի մասնակցել է 25 ընտանիք Արցախի բոլոր շրջաններից և Ստեփանակերտից:
«Տարեցտարի մասնակից ընտանիքների թիվը մեծանում է, ինչը վկայում է ծրագրի հաջողված լինելու մասին»,- նշել է ԼՂՀ մշակույթի և երիտասարդության հարցերի նախարարության երիտասարդության հարցերի բաժնի պետ Դավիթ Ղուկասյանը:
Ծրագրի հիմնական նպատակն ու խնդիրներն են ընտանեկան արժեքների քարոզչությունը, ընտանեկան հանգստի ակտիվ ձևերի մասսայականացումը, հայրենասիրության ու քաղաքացիական պատասխանատվության դաստիարակությունն ու առողջ ապրելակերպի խթանումը: Մարտունի քաղաքում բնակվող Ավագիմյանների ընտանիքն արդեն երրորդ անգամ է մասնակցում ընտանեկան ճամբարին: Ընտանիքի հայրը՝ Ժիրայր Ավագիմյանն իր գոհունակությունն է հայտնել ճամբարում ստեղծված պայմաններից:
«Կցանկանայի, որ ծրագիրը շարունակական լիներ և բոլոր ընտանիքներն էլ հնարավորություն ունենային մասնակցել ճամբարին: Հաճելի տպավորություններ ենք ստացել այստեղ, ծանոթացել ու բարեկամացել ընտանիքներով: Բոլոր ընտանիքների անունից շնորհակալություն եմ հայտնում նրանց, ովքեր կազմակերպել ու աջակցել են ճամբարի կայացմանը»,-ասել է Ժ. Ավագիմյանը:
Երեկ ընտանեկան ճամբարում, ընտանիք-թիմերի միջև անցկացվել են նաև ազգային-ավանդական, մարզա-տուրիստական, մշակութային մրցույթներ, որոնց հաղթողները պարգևատրվել են արժեքավոր նվերներով ու պատվոգրերով:
Մրցույթին ներկա են եղել նաև ԼՂՀ Ազգային ժողովի նախագահ Աշոտ Ղուլյանը, մշակույթի և երիտասարդության հարցերի նախարար Նարինե Աղաբալյանը և ԼՂՀ նախագահի խորհրդական Գրիգորի Գաբրիելյանցը:
Մշակույթի և երիտասարդության հարցերի նախարարության ներկայացուցիչ Դ. Ղուկասյանի հաղորդմամբ՝ առաջին տեղի համար մրցանակը՝ ուղեգիր՝ Սոչիում հանգիստն անցկացնելու համար, շնորհել են ԼՂՀ ազգային ժողովի նախագահը և վարչապետը, երկրորդ տեղի համար մրցանակը հատկացրել է Ստեփանակերտի քաղաքապետարանը, իսկ երրորդ տեղի համար՝ Գրիգորի Գաբրիելյանցը:
Մրցույթներն ուղեկցվում էին ռազմահայրենասիրական երգերի ու ազգագրական պարերի կատարմամբ:
Լուսանկարները` Դավիթ Ղուկասյանի
