Թուրքիայի նախագահ Ռեջեփ Թայիփ Էրդողանը, մեկնաբանելով նախօրեին Գազիանթեփ (պատմական Այնթափ) քաղաքում տեղի ունեցած ահաբեկչությունը, հայտարարել է, որ Գազիանթեփի Շահինբեյ շրջանում տեղի ունեցած ահաբեկչությունն իրականացրած մահապարտը 12-14 տարեկան է եղել:
Գազիանթեփի ահաբեկչությունն իրականացնողը 12-14 տարեկան մահապարտ է եղել. Էրդողան
ՍՏԵՓԱՆԱԿԵՐՏ, 22 օգոստոսի, ԱՐՑԱԽՊՐԵՍ: «Ունենք 51 զոհ, ի սկզբանե եղել է 94 վիրավոր, սակայն եթե այս ցուցակից հանենք հիվանդանոցից դուրս գրվածներին, ապա այս պահին ունենք շուրջ 69 վիրավոր, որոնցից 17-ի վիճակը ծայրահեղ ծանր է»,- «Անադոլու» գործակալության փոխանցմամբ՝ ասել է նա։
Էրդողանը խուսափել է հասցեական մեղադրանքներ հնչեցնել և հստակ նշել որևէ ահաբեկչական խմբավորման անուն:
«Դա կարող է լինել ԻՊ-ը («Իսլամական պետություն» խմբավորումը), կամ գյուլենականները (ԱՄՆ-ում բնակվող կրոնական քարոզիչ Ֆեթուլլահ Գյուլենը, որն Էրդողանի կողմից մեղադրվում է հուլիսի 15-ի հեղաշրջման փորձը կազմակերպելու համար), դա կարող է լինել քրդական PKK-ն (Քուրդիստանի աշխատավորական կուսակցություն), կարող են լինել նաև Սիրիայից ներթափանցած PYD և YPG (Սիրիայի տարածքում գործող քրդական ազգային ինքնապաշտպանական ջոկատները) զինյալները: Որտեղից էլ ուղղորդված լինի այս ահաբեկչությունը, միևնույն է` ահաբեկչությունն ահաբեկչություն է: Մենք մեր ժողովրդի հետ միասին հաղթահարելու ենք սա, ուս ուսի տված` ինչպես հուլիսի 15-ի գիշերը»,- ասել է նա:
Թուրքիայի նախագահը, սակայն, չի մոռացել կարևոր ուղերձներ հղել Արևմուտքին և, նկատի ունենալով Սիրիայի տարածքում գործող քրդական ուժերին, ակնարկել է. «Հուսանք Արևմուտքը սրանից դաս կքաղի և կվերանայի որոշ խմբավորումների աջակցելու իր դիրքորոշումները»։