Մենք մտել ենք Լեռնային Ղարաբաղի հակամարտության կարգավորման բոլորովին այլ փուլ:
Ադրբեջանի տապալված, կեղտոտ հարձակումը մի ազդանշան էր մեր իշխանությունների համար՝ ԶՈՒ-ն պետք է ուժեղացվի. Լարիսա Ալավերդյան
ՍՏԵՓԱՆԱԿԵՐՏ, 22 օգոստոսի, ԱՐՑԱԽՊՐԵՍ: Լրագրողների հետ զրույցում այսօր այս մասին ասաց ՀՀ մարդու իրավունքների առաջին պաշտպան Լարիսա Ալավերդյանը:
Միաժամանակ, Ալավերդյանը դժգոհեց, որ հայտնի էլ չէ՝ բանակցային գործընթաց կա, թե ոչ: Այնուամենայնիվ, նախկին ՄԻՊ-ի խոսքով, բանակցային գործընթաց լինել չի կարող, քանի դեռ Արցախն ընդգրկված չէ բանակցային գործընթացներում:
«Կա ԵԱՀԿ Մինսկի խմբի ճգնաժամ: Այս տարիների ընթացքում այս խմբի կողմից տարվող գործընթացի անունն ինչ էլ դնենք, ապրում է ճգնաժամ: Դրա մասին վկայում է ոչ միայն այն, որ կողմերի միջև չկա հակամարտության կարգավորման շուրջ պայմանավորվածություն, այլև այն, որ Մինսկի խմբի համանախագահները համեստ ու զգուշավոր են իրենց հայտարարություններում: Կփորձենք, ձգտում ենք, անում ենք... Սրանք են նրանց բառերը, իսկ սա ոչ այլ ինչ է, քան անգործություն»,- ԹԵՐԹ.ամ-ի փոխանցմամբ՝ նշեց Լարիսա Ալավերդյանը:
Վերջինս ընդգծեց նաև, որ հայկական կողմի դիրքորոշումը ԼՂ հակամարտության կարգավորման հարցում իր համար պարզ չէ: «Քառօրյա պատերազմից հետո պարզվեց, որ Ադրբեջանի դիրքորոշումը մազաչափ անգամ չի փոխվել, իսկ հայկական կողմի մոտեցումները եղել ու մնում են հեղհեղուկ: Սեղանին դրված է այլ փաթեթ, զիջումների, հողերի, որը մեր բոլոր իշխանավորների թեթև ձեռքով ստացել է ավելի անհասկանալի բնութագիր: Բորբոքված ելույթներ են ունենում, թե ով է ասում, որ մենք հողեր ենք տալու, ով է ասում, որ նման խոսակցություններ կան, բայց ե՞ս եմ Կազանի մասին լուրը տվել, ե՞ս եմ հայտարարել, որ համաձայնել ենք այդ փաստաթղթին: Այս ազնվական բորբոքումն ամենևին տեղին չէ, հասցեական չէ»,- շեշտեց Լարիսա Ալավերդյանը:
Խոսելով հայկական կողմի քայլերի մասին, որոնք բանախոսի խոսքով, պետք է նախաձեռնվեին, բայց ավաղ չեն նախաձեռնվել, Լարիսա Ալավերդյանը նկատեց. «ԵԱՀԿ-ն, բացի Մինսկի խմբից, ունի այլ ինստիտուտներ, օրինակ, փաստերի ուսումնասիրման մարմին: Այդ ինչի՞ Ադրբեջանը տեղի-անտեղի կդիմի այդ մարմին, ԵԱՀԿ-ն էլ կգա կստուգի, մենք չենք կարող»:
Ալավերդյանի խոսքով՝ ինչ էլ պատահի, եթե իշխանություններն անգամ այդքան զգայուն չգտնվեն, ժողովուրդն անելու է ամեն ինչ՝ ի հեճուկս նրանց, ինչպես դա արվեց 90-ական թվականներին:
Իսկ լայնամասշտաբ պատերազմի հավանականությունը, Լարիսա Ալավերդյանի դիտարկմամբ, բացառված չէ: «Պատերազմի հավանականությունը բավական լուրջ մակարդակի վրա է: Մենք չունենք հաջողություններ դիվանագիտության մեջ, որ ասենք, թե իջեցվել է այդ վտանգի աստիճանը: Դա նշանակում է, որ Ադրբեջանի տապալված, կեղտոտ հարձակումը մի ազդանշան էր մեր իշխանությունների համար, որ ԶՈՒ-ն ուժեղացվի և ոչ այլ ինչ»:
Ինչ վերաբերում է Ադրբեջանի ու Հայաստանի նախագահների միջև սպասվող հանդիպմանը, Լարիսա Ալավերդյանը վստահ է, որ դա որևէ դրական արդյունք հակամարտության կարգավորմանը չի տա: «Դրանով Մինսկի խումբն ուզում է ցույց տալ իր շարունակականությունը, ապահովել իր շարունակելիությունն, իսկ մենք որևէ ակնկալիք դրանից չպետք է ունենանք: Բայց սա չի նշանակում, որ ես դեմ եմ հանդիպումներին: Հանդիպումների առկայությունը նշանակում է, որ գոնե պատերազմ պիտի չլինի»:
