Հեղաշրջման փորձից ի վեր Թուրքիայում Քուրդիստանի աշխատավորական կուսակցության զինյալները շուրջ 20 ահաբեկչություն են իրականացրել:
Հեղաշրջման փորձից ի վեր Թուրքիայում քուրդ զինյալները շուրջ 20 ահաբեկչություն են իրականացրել. TRT
ՍՏԵՓԱՆԱԿԵՐՏ, 26 օգոստոսի, ԱՐՑԱԽՊՐԵՍ: Այս մասին հաղորդում է թուրքական TRT հեռուստաալիքը:
Նշվում է, որ հուլիսի 15-ից մինչ օրս իրականացված 20 ահաբեկչական գործողությունների ընթացքում մահացել է շուրջ 46 զինվոր և ոստիկան, վիրավորվել են հարյուրավոր մարդիկ:
Քուրդ զինյալների հարձակումներն իրականացվել են Էլյազըղ, Վան, Բինգյոլ, Թունջելի, Ուրֆա, Բիթլիս, Դիյարբեքիր, Բաթման, Հաքքարի, Շըրնաք, Սղերդ, Մարդին նահանգներում:
Հիշեցնենք, որ ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-գրդական հարաբերությունների սրման հերթական փուլը սկսվել է 2015-ի ամռանը:
Հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, ով ներկայումս բնակվում է ԱՄՆ Փենսիլվանիա նահանգում: