Նախօրեին Հալեպում տեղի է ունեցել հանդիսավոր ընդունելություն` նվիրված ՀՀ-ի Անկախության 25-ամյակին:
Հալեպում շուքով նշվել է ՀՀ-ի Անկախության 25-ամյակը
ՍՏԵՓԱՆԱԿԵՐՏ, 26 սեպտեմբերի, ԱՐՑԱԽՊՐԵՍ: Հալեպի «Գանձասար» շաբաթերթի գլխավոր խմբագիր Զարմիկ Պողիկյանի փոխանցմամբ` տոնի առթիվ սեպտեմբերի 25-ի երեկոյան Հայաստանի Հանրապետության Հալեպի գլխավոր հյուպատոս Տիգրան Գևորգյանը պաշտոնական ընդունելություն է կազմակերպել Հալեպի Սուրբ Աստվածածին եկեղեցում:
Միջոցառման բացումը կատարվել է ՀՀ և Սիրիայի օրհներգերով:
Ողջունելով հյուրերին` ՀՀ Հալեպի գլխավոր Հյուպատոս Տիգրան Գևորգյանն մասնավորապես ասել է. «25 տարի առաջ մեր ժողովուրդը բացել է իր պատմության հերթական էջը` աշխարհին ապացուցելով, որ պատրաստ է ազատ, անկախ , ինքնիշխան լինել և իր ճակատագիրը կերտել սեփական ուժերով: Իրականություն դարձավ այն, ինչ երազում էր համայն հայությունը. մենք ունեցանք ազատ, անկախ Հայաստանի Հանրապետությունը: Մենք միասնական էինք. Հայաստան-Արցախ և Սփյուռք եռամիասնությամբ կարողացանք լուրջ հաջողություններ արձանագրել: Սփյուռքի օժանդակության հարցում իր ուրույն տեղն ունի Հալեպի գաղթօջախը: Հայ ժողվուրդը երբեք չի մոռանա Սիրիայի ժողովրդի վերաբերմունքը, երբ Օսմանյան կայսրության կողմից իրագործված ցեղասպանված հայ ժողովրդի վերջին բեկորներին ապաստանել ու պայմաններ է ստեղծել նրանց համար` ապրելու, արարելու հարատևելու: Այսօր փոխվել են ժամանակները. Հալեպի տարագիր ժողովրդին ու Սիրիայի հայորդիներին սատարելու հերթը Հայաստանի Հանրապետությանն է: Մայր հայրենիքն անում է ամեն ինչ, որ պատերազմից մազապուրծ իր զավակներին գրկաբաց ընդունի: Օրհասական այս պահերին սիրիահայության կողքին է ոչ միայն Մայր Հայրենքը, այլ ողջ հայությունը»:
Ելույթի ավարտին հյուպատոսը խաղաղություն է մաղթել Հայաստանին, Արցախին, Սիրիային և համայն աշխարհին: Օրվա խորհրդին նվիրված հնչել են նաև այլ ելույթներ: Միջոցառմանը ներկա էին և ՀՀ Անկախության 25-ամյակը շնորհավորելու էին եկել Սիրիայի Խորհրդարանի Հալեպի պատգամավորները, Հալեպի նորանշանակ նահանգապետ Հուսեին Ահմատ Տիապը, Պաս Կուսակցության Հալեպի պետը, պետական և հայ համայնքի այլ պատասխանատուներ: