Ստեփանակերտի Հանրապետական բժշկական կենտրոնում ՀՀ արյունաբանության և ուռուցքաբանության հայկական ասոցիացիան «Մեծահասակների ուռուցքաբանություն/արյունաբանություն» թեմայով գիտաժողով է անցկացնում:
Արյունաբանության և ուռուցքաբանության հայկական ասոցիացիան Ստեփանակերտում գիտաժողով է անցկացնում
ՍՏԵՓԱՆԱԿԵՐՏ, 27 սեպտեմբերի, ԱՐՑԱԽՊՐԵՍ:
Գիտաժողովին բացման խոսքով հանդես է եկել ԼՂՀ առողջապահության փոխնախարար Կարեն Ղուկասյանը` նշելով, որ Արցախում մեծ նշանակություն են տալիս արյունաբանության և ուռուցքաբանության զարգացմանը:
«Մենք կարևորում ենք Արցախում նման գիտաժողովների անցկացումը:Դրա վառ ապացույցներից մեկն է հանրապետական բժշկական կենտրոնում ուռուցքաբանական դիսպանսերի նոր մասնաշենքի կառուցումը»,- ասել է Կ. Ղուկասյանը:
Գիտաժողովի սկզբում արյունաբանության և ուռուցքաբանության հայկական ասոցիացիայի անդամ մանկական օնկոլոգ և գինեկոլոգ Գևորգ Թամամյանը ներկայացրել է ասոցիացիայի կատարած աշխատանքերը և ԼՂՀ մասնագետներին առաջարկել ներգրավվել այդ աշխատանքներում` համագործակցել այդ ուղղությամբ. անդամակցությունը ասոցիացիային անվճար է: Այնուհետև ասոցիացաիայի անդամները և երևանյան առաջատար մասնագետները գիտաժողովի մասնակիցների համար հանդես են եկել մասնագիտական դասախոսություններով:
ՀՀ ուռուցքաբան-գինեկոլոգ Վահե Տեր-Մինասյանը, ով նաև ասոցիացիայի անդամ է, շեշտում է այն փաստը, որ քաղցկեղը հաճախ առաջանում է այն դեպքում, երբ կինը պարզապս չի հետազոտվում:
«Արգանդի պարանոցի քաղցկեղը կրծքագեղձի քաղցկեղից հետո երկրորդ տեղում է կանանց մոտ: Ունենք շատ մեթոդներ որպեսզի քաղցկեղը վաղ էտապում հայտնաբերենք և հիվանդին կարողանանք փրկել: Եթե բժշկական համակարգը ճիշտ աշխատի և կինը տարին մի քանի անգամ հետազոտություն անցնի, ապա մենք կարող ենք կանխարգելել արգանդի պարանոցի քաղցկեղը և իսպառ վերացնել: Նախաքաղցկեղային էտապում այն կարելի է ամբողջովին կանգնեցնել: Արգանդի մարմնի քաղցկեղը ցավոք սրտի չենք կարող լրիվությամբ կանխարգելել»,-«Արցախպրես»-ի թղթակցի հետ զրույցում ասել է Վ. Տեր-Մինասյանը:
Նշենք, որ արյունաբանության և ուռուցքաբանության հայկական ասոցիացիան արյունաբանների և ուռուցքաբանների մասնագիտական կազմակերպություն է (հիմնադրվել է Երևանում, 2012 թվականին) որի նպատակն է զարգացնել արյունաբանությունը, ուռուցքաբանությունը, ինչպես նաև բժշկագիտության հարակից ճյուղերը Հայաստանի Հանրապետությունում։