Թուրքիայի Կոնիայի նահանգի Աքշեհիր քաղաքի հայկական եկեղեցին անուշադրության է մատնված։ Այս մասին գրում է Ստամբուլի հայ համայնքի թերթերից «ՀայԹերթը»:
Թուրքական Աքշեհիր քաղաքի հայկական եկեղեցին անուշադրության է մատնված
ՍՏԵՓԱՆԱԿԵՐՏ, 27 սեպտեմբերի, ԱՐՑԱԽՊՐԵՍ: Բնակիչները բողոքում են, որ ուսումնական տարին սկսվելուն զուգահեռ՝ եկեղեցու լքված շենքը դարձել է աշակերտ-աշակերտուհիների հանդիպման վայր, իսկ պատերի վրա ավելացող գրությունների պատճառով եկեղեցու պատերը գովազդային տախտակ են հիշեցնում:
«Արդեն գիշերները վախենում ենք դուրս գալ, կողքով անցնել, չենք իմանում, թե լքված շենքի միջից ինչ կամ ով դուրս կգա: Ամբողջ ամառ այստեղ գալիս էին հյուրեր, զբոսաշրջիկներ: Սա ուշադրություն գրավող, զբոսաշրջային մի վայր կարող է դառնալ, բայց եկեղեցին վերանորոգելու համար ոչ մի քայլ չի արվել: Եկեղեցուն շրջապատող ծառերը չորանում են, դուռը և լուսամուտները կոտրված են, եկեղեցին ամբողջովին ավերակի է նմանվել», - ասել են բնակիչները:
Նշենք, որ 19-րդ դարում կառուցված Աքշեհիրի հայկական եկեղեցին ժամանակ առ ժամանակ օգտագործվել է որպես մշակութային կենտրոն: Չնայած եկեղեցու նորոգման և վերաբացման խոստումներին՝ Աքշեհիրի քաղաքապետարանն այդպես էլ ոչ մի քայլ չի ձեռնարկել եկեղեցին վերանորոգելու ուղղությամբ:
