ԱՄՆ Նյու Յորք քաղաքում «Հայաստան» ներդրումային համաժողովի շրջանակում Ասիական զարգացման բանկի Հայաստանի ներկայացուցիչ Դեյվիդ Դոլն առաջարկ է հնչեցրել Վրաստանում գտնվող Լարսի միջանցիկ ավտոճանապարհի թողունակության բարձրացմանն ուղղված համատեղ՝ Ռուսաստան-Վրաստան-Հայաստան եռակողմ միջոցառումների ծրագրի մշակման մասին:
Դեյվիդ Դոլն առաջարկել է բարձրացնել Լարսի միջանցիկ ավտոճանապարհի թողունակությունը
ՍՏԵՓԱՆԱԿԵՐՏ, հոկտեմբերի 12, ԱՐՑԱԽՊՐԵՍ: «Սա կարևոր աշխատանք է, քանի որ Լարսի ավտոճանապարհը Հայաստանի միակ ցամաքային ուղին է դեպի Ռուսաստանի շուկա և միջազգային կառույցն ունի այն փորձն ու հմտությունը, որ համակարգի եռակողմ աշխատանքները»,-Panorama.am-ի փոխանցմամբ՝ ասել է Դեյվիդ Դոլը:
Հայաստանի զարգացման հիմնադրամի մամուլի ծառայության հաղորդմամբ, ԱՄՆ Նյու Յորք քաղաքում «Հայաստան» ներդրումային համաժողովի շրջանակում կազմակերպված թեմատիկ նիստի մասնակիցներն անմիջականորեն կառավարության ներկայացուցիչների կողմից տեղեկություններ են ստացել կապի և տրանսպորտի ոլորտի ներկա զարգացումների մասին:
«Հայաստանն իր աշխարհագրական դիրքով կապի և տրանսպորտի ոլորտում հավակնում է ծառայել որպես կարևոր խաչմերուկ։ Այսօրվա կապի ոլորտում հասանելի ենթակառուցվածքները և իրականացվող գործողություններն արդեն իսկ վկայում են դրա մասին»,- նշել է Հ Տրանսպորտի, կապի և տեղեկատվական տեխնոլոգիաների նախարարի տեղակալ Արթուր Առաքելյանը:
Հիմնադրամի փոխանցմամբ, ոլորտի հիմնական պատկերը ներկայացնող զեկույցում ներկայացված են հասանելի ենթակառուցվածքները, բաց երկնքի քաղաքականության արդյունքում ընձեռված հնարավորությունները, բարելավվող միջպետական ճանապարհները, Ծոցի երկրների հետ ռազմավարական երկաթուղու կառուցման և Մերձավոր Արևելքի ու Արևելյան Ասիայի երկրները միմյանց կապելու հնարավորությունները: Քննարկման առարկա են դարձել կամրջող հաղորդակցության ենթակառուցվածքները: