Լեռնային Ղարաբաղի հակամարտության կարգավորման հարցում փոխզիջում հնարավոր է, այն կարող է ինքնավար հանրապետություն դառնալ:
Լեռնային Ղարաբաղի կարգավիճակի վերաբերյալ Ալիևի հայտարարությանը արձագանքել են Երևանում և Ստեփանակերտում
ՍՏԵՓԱՆԱԿԵՐՏ, հոկտեմբերի 18, ԱՐՑԱԽՊՐԵՍ: Այդ մասին հայտարարել է Ադրբեջանի նախագահ Իլհամ Ալիևը «Ռուսաստանն այսօր» («Россия сегодня») միջազգային լրատվական գործակալության գլխավոր տնօրեն Դմիտրի Կիսիլյովին տված հարցազրույցում, հայտնում է Թերթ.ամ-ը:
Անդրադառնալով Ալիևի այս հայտարարությանը ՀՀ ԱԺ փոխնախագահ, ՀՀԿ խոսնակ Էդուարդ Շարմազանովը նշել է, որ Լեռնային Ղարաբաղի ժողովուրդը 1988թ. սկսել է պայքարել ազատ և անկախ ապրելու իրավունքի համար և Իլհամ Ալիևը չէ, որ պետք է որոշի Լեռնային Ղարաբաղի կարգավիճակը:
«Եթե պարոն Ալիևը տեղյակ չէ, ապա ես տեղեկացնեմ, որ բանակցային սկզբունքներից մեկը ինքնորոշման իրավունքի իրացումն է: Մինսկի խմբի համանախագահ երկրների նախագահները բազմաթիվ անգամներ հայտարարել են, որ ինքնորոշման իրավունքի իրացումը երեք սկզբունքներից մեկն է տարածքային ամբողջականության և խաղաղ կարգավորման հետ մեկտեղ»,- ընդգծել է ԱԺ փոխնախագահը:
Ավելի ուշ Ադրբեջանի նախագահի հայտարարությանը արձագանքել է նաև ԼՂՀ նախագահի մամուլի խոսնակ Դավիթ Բաբայանը, ով նշել է, որ Ալիևի հայտարարությունը հերթական անգամ ցուցադրում է, որ Բաքուն որքան պատրաստ չէ համապարփակ եւ երկարաժամկետ կարգավորմանը։
«Ադրբեջանի իշխանությունները լավ կանեին ինքնավարություն տային այդ երկրում ապրող ազգային փոքրամասնություններին՝ թալիշներին, ավարներին, լեզգիներին, թաթերին եւ այլ ազգություններին, ընդ որում, դա անել նախքան իրավիճակը մեծամասշտաբ բախման կվերածվի։ Մինչդեռ այդ ազգություններն ապրում են ուժեղ ճնշման տակ եւ գրեթե համակենտրոնացման ճամբարների պայմաններում»,– ասել է Բաբայանը։