Արցախի տեղեկատվական տեխնոլոգիաների կենտրոնում (AITC) արդեն գործում է տեղական սթարթափ ընկերություն, որը որակական բեկում է մտցնելու Լեռնային Ղարաբաղի Հանրապետության տեղեկատվական ոլորտում, որի միջոցով արցախցին կարող է ապրել այլ էկոնոմիկա ունեցող հասարակության մեջ:
Արցախի ՏՏ կենտրոնում գործում է սթարթափ ընկերություն
ՍՏԵՓԱՆԱԿԵՐՏ, հոկտեմբերի 19, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Արցախի ՏՏ կենտրոնի գործադիր տնօրենի խորհրդատու Հրաչյա Արզումանյանը:
«Մենք բոլորս հասկանում ենք, որ տեղեկատվական տեխնոլոգիաները 21-րդ դարի զարգացման ուղիներից մեկն է, և մենք պետք է պայմաններ ստեղծենք, որ այդ տեխնալոգիաները բոլորի համար դառնան սովորական: Այսինքն՝ ոչ միայն այն առօրյա կյանքում կարևոր դառնա, այլ դրանց շնորհիվ զարգանա նաև երկրի տնտեսությունը:
Այսօր Արցախում մարդիկ օգտագործում են տեղեկատվական տեխնոլոգիաների հնարավորությունները, բայց դա երկրի զարգացման համար դեռևս բավարար չէ: Մենք ոչ միայն պիտի մասնակցենք տեղեկատվական հեղափոխությանը, այլ սովորենք դրա հիման վրա կառուցել էկոնոմիկան: Իսկ այդ ամենը իրագործելու համար պետք է նախ դրա հիմքերը դնենք, աճեցնենք կադրեր, որոնց միջոցով էլ որոշ ժամանակ անց մենք կկարողանանք հասնել մեր նապատակին: Այս հարցում մեն լուրջ ակնկալիքներ ունենք նաև Արցախի մայր բուհից»,- մանրաասնել է Հ. Արզումանյանը՝ ընդգծելով, որ ՏՏ ոլորտն Արցախում արդեն հռչակվել է որպես տնտեսության գերակա ճյուղերից մեկը: Արցախի տեղեկատվական կենտրոնը, ինպես նշում է Հրաչյա Արզումանյանը, հենց ստեղծվել է նրա համար, որպեսզի այն ծառայի այդ նպատակին:
«Մենք պետք է նախ հիմքեր ստեղծենք, որ երիտասարդ ընկերությունները, ամրապնդվելով Արցախում, ստեղծեն իրենց բիզնեսը: Եվ եթե մենք ցանկանում ենք տեղեկատվական ոլորտում հեղափոխություն իրագործել, այն պետք է սկսենք հենց դպրոցներից, որպեսզի փուլ առ փուլ հասնենք այն մակարդակին, որը ընդունված է: Արցախի տեղեկատվական ոլորտում հնարավոր չէ արագ աճ գրանցել, որովհետև այստեղ ուղղակի անհրաժեշտ պայմաններ չկան: Մեր ծրագրի իրագործումն ավելի շատ նման է այգի մշակելուն. փխրեցնում ես հողը, այնուհետև ծառ ես տնկում, ու սպասում մի քանի տարի, որ այդ ծառը պտուղ տա: Սթարթափը որակական բեկում է մտցնելու Արցախում, որը հնարավորություն կտա մոտ 20 տարի հետո ապրել այլ հասարակության մեջ և ունենալ բարձր մակարդակի ժամանակակից էկոնոմիկա,- ասել է Հրաճչյա Արզումանյանը և հավելել,- Համոզված եմ՝ Արցախի ՏՏ կենտրոնն աճի դեպքում կունենա այսպիսի մեծ սթարթափ:
Տեղեկատվական տեխնոլոգիաների զարգազման համար Արցախի ՏՏ կենտրոնը շարունակում է կազմակերպել մի շարք դասընթացներ:
Հոկտեմբերի 3-ից կենտրոնի նորաբաց «Արմաթ» ինժեներական լաբորատորիայում գործում է ինժեներական խմբակ:
«Արցախի դպրոցականները կարողանում են մոտիկից ծանոթանալ տեղեկատվական տեխնոլոգիաների հետ՝ ավելի մանրամասն ռոբոտաշինությանը: Այս պահի դրությամբ խմբակ է այցելում 40 երեխա. նրանք «Աղվես» ծրագրի շնորհիվ սովորում են ծրագրավորմնան հիմունքները, որոնք էլ հիմք են դառնալու ռոբոտաշինությունը զարգացնելու համար,- ասել է լաբորատորիայի ղեկավար Ալբերտ Ծատրյանը և ավելացրել,- Արցախի ՏՏ կենտրոնի դիմաց տեղադրվել է ռոբոտի մետաղական արձան՝ «Սայլակով այգեպան», որը խորհրդանշում է խաղաղություն և բարություն՝ ցույց տալով մարդկանց, որ տեխնիկան պետք է ծառայեցնել մարդկության բարօրությանը»:
Կենտրոնի կայացմանը նպաստում է նաև Synergy ընկերության հայկական մասնաճյուղը. նրանց մասնագետներից ներգրավված են Արցախի ՏՏ ոլորտի աշխատանքների մեջ: Աշխատանքները իրականացվում են ինչպես անհատական, այնպես էլ խմբերով:
Ընկերության աշխատակից Անուշ Դոլուխանյանը մեզ հետ զրույցում ասել է. «Կիրառական մաթեմատիկայի 3-րդ կուրսում էի սովորում, երբ դասախոսիս խորհրդով սկսեցի հաճախել «Սիներջի Սիսթեմս» ընկերության դասընթացներին: Ձեռք եմ բերել մասնագիտություն. այժմ Ուզբեկստանի ֆինանսական ոլորտի համար ծրագրեր եմ մշակում»:
«Իսկ ես Պերուի հետ եմ համագործակցում. անտառահատմանը վերաբերող ծրագրեր եմ գրում, որպեսզի այնտեղի մարդկանց համար պարզ լինի, թե որ ծառերը կարելի է հատել, որը՝ ոչ: Մեր ծրագրերի օգնությամբ նաև նրանց համար պարզ է դառնալու, թե որ ծառը ինչի համար է նախատեսված օգտագործելու: Հուսանք, որ նման ծրագրերը կօգնեն նաև Արցախի տնտեսության զարգացմանը:«Սիներջի Սիսթեմս» ընկերությունը սովորողների զարգացման համար մեծ հնարավորություններ է
ընձեռում. խորհուրդ կտամ բոլորին՝ անպայման գալ մեզ մոտ սովորելու»,- նշել է ընկերության մեկ այլ աշխատակից Ելենա Ազիզյանը:
«Արդեն Արցախի ու 50-ից ավելի երկրների համար մենք ծրագրեր ենք գրել: Լավ ենք տիրապետում Java ծրագրավորման լեզվին: Կարողանում ենք օգտագործել նաև HTML, CSS, Java Script և այլ ծրագրեր»,- ասել է ընկերության աշխատակից Ալբերտ Օհանյանը:
«Արցախի ՏՏ կենտրոնում ԼՂՀ վարչապետի և Արցախի երիտասարդ գործատուների միության նախաձեռնությամբ ու ֆինանսավորմամբ ստեղծվել և գործում է նաև Otecsys ըներությունը, որը զբաղվում է վեբ-ծրագրավորմամբ»,- տեղեկացրել է ընկերության տնօրեն Նվեր Դադամյանը: