«Ղարաբաղ կարպետ» գորգագործական ընկերությունը, որը ստեղծվել է 2013 թվականից, այս տարիների ընթացքում ունեցել է կարևոր ձեռքբերում. թողարկված բարձրորակ արտադրանքը շատ շուկաներում ունի մեծ պահանջարկ:
«Ղարաբաղ կարպետ» ընկերությունն արտադրանքի իրացման խնդիրներ ունի. տնօրեն (լուսանկարներ)
ՍՏԵՓԱՆԱԿԵՐՏ, հոկտեմբերի 20, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ընկերության տնօրեն Սևակ Խաչատրյանը և նշել, որ տարիներ շարունակ ընդհատված է եղել հայկական գորգագործության արտադրությունը և այն վերականգնելու համար իրենք լուրջ խոչընդոտներ են հաղթահարել:
«Արցախում գործում էր 5 արտադրամաս Շուշիում, Ստեփանակերտում, Ճարտարում, Հադրութում և Բերձորում: Ցավոք սրտի, այսօր ունենք 3 արտադրամաս. փակվել են Հադրութի և Բերձորի արտադրամասերը. պատճառն այն է, որ արտադրանքի իրացման հնարավորությունները նվազել են:
Երեք տարիների ընթացքում ընկերության 180 աշխատողների թիվը, կախված արտադրամասերի կասեցման հետ, նվազելով հասել է 117-ի: Աշխատողների միջին աշխատավարձի չափը կազմում է 75.000 դրամ. այն տրվում է գործավարձային հիմունքներով:
Ըստ ընկերության որդեգրած քաղաքականության` Արցախի բոլոր շրջաններում պետք է ունենայինք առնվազն մեկ արտադրամաս: Նոր շուկաների հայտնաբերման և վաճառքի ընդլայնման արդյունքում մենք առաջնահերթ կվերագործարկցենք Բերձորի և Հադրութի արտադրամասերը»,-ասել է Ս. Խաչատրյանը և հավելել, որ 2013 թվականից առ այսօր տարեկան միջինը 500 գորգ է արտադրվում:
Անդրադառնալով արտադրանքի իրացման հարցին` ընկերության տնօրենը կարևորել է 2014 թվականի աշնանը Երևանում բացված «Ղարաբաղ կարպետ»-ի ֆիրմային խանութ-սրահի գոյությունը։ Այդ կերպ հնարավորություն է ընձեռվել արցախյան գորգագործների արտադրանքը ներկայացնել ոչ միայն Հայաստանում, այլև Երևան այցելող բազմաթիվ զբոսաշրջիկների։
«Արցախի ազգային վիճակախաղ» ՓԲԸ-ն հանդիսանում է «Ղարաբաղ կարպետ» ընկերության հիմնական պատվիրատուն. երեք տարի է ինչ համագործակցում են:
«Մենք արտադրանքն արտահանում ենք հիմնականում Միացյալ Նահանգներ, Ռուսաստանի Դաշնություն որտեղ Սփյուռքի մեր հայրենակիցներն օժանդակում են գորգերի իրացման գործին։ Մենք առանձին պատվերներ ենք ստանում նաև աշխարհի այլ երկրներից։ Մեր պաշտոնական կայքէջում գործում է առցանց վաճառք-խանութ, որի միջոցով նույնպես պատվերներ ենք ընդունում»,- մանրամասնել է տնօրենը։
Ս. Խաչատրյանի խոսքով` մեր ընկերության հաջորդ քայլը լուրջ մարկետինգային քաղաքականության մշակումն է լինելու, որպեսզի արցախյան գորգագործական ընկերության արտադրանքը պատշաճ կերպով ներկայացվի միջազգային շուկայում։
«Հայտնի է, որ ձեռագործ գորգը թանկարժեք ապրանք է: Արտադրանքի գինը կախված է գորգի խտությունից. 1քմ-ն արժե 160.000 դրամ: Իհարկե, կան գորգեր, որոց վրա ավելի բարդ աշխատանքներ է կատարվել, ինչն արդեն ինքնին բարձրացնում է գորգի ինքնարժեքը: Արդեն 3 ամիս է, ինչ ընկերությունն արտադրում է նաև կարպետներ, որոնց 1քմ-ը արժե 70.000 դրամ: Մեր ընկերությունում հիմնականում արտադրում ենք վառ գույներով հայկական ավանդական նախշազարդերով գորգեր:
Գործում ենք նաև բազմերանգ գույներով կլասիկ, մոդեռն, էկո ոճերի գորգեր»,-ասել է Ս. Խաչատրյանը և ընդգծել, որ «Ղարաբաղ կարպետ» ընկերության ստեղծման հիմնական նպատակներից մեկն էլ հայկական-արցախյան ավանդական հարուստ գորգագործության մշակույթի վերականգնումն է և այն աշխարհին ներկայացնելը»,-ասել է Ս. Խաչատրյանը` ափսոսանք հայտնելով, որ ընկերության արտադրանքը դեռևս լրիվությամբ իրացնելու հնարավորություն չունի: