Եվրոպայի խորհրդի գլխավոր քարտուղար Թորբյորն Յագլանդն այսօր տեսաուղերձ է հղել Երևանում անցկացվող «Սահմանադրական դատարանների որոշումների դերն ու կարևորությունը օրենսդրական բացերի և իրավական անորոշության հաղթահարման գործում» միջազգային խորհրդաժողովի մասնակիցներին, որը կազմակերպվել է ՀՀ Սահմանադրական դատարանի, Վենետիկի հանձնաժողովի և Նոր ժողովրդավության երկրների սահմանադրական վերահսկման մարմինների կոնֆերանսի կողմից։
ԵԽ գլխավոր քարտուղարը տեսաուղերձ է հղել Երևանում անցկացվող միջազգային խորհրդաժողովի մասնակիցներին
ՍՏԵՓԱՆԱԿԵՐՏ, հոկտեմբերի 21, ԱՐՑԱԽՊՐԵՍ: Խորհրդաժողովի մասնակիցներին ուղղված ուղերձում ԵԽ գլխավոր քարտուղարը նշում է, որ մեծ պատիվ է դիմել խորհրդաժողովի մասնակիցներին, որին, ցավոք, անձամբ չի կարողացել մասնակցել, հայտնում է panorama.am-ը։
Խորհրդաժողովին մասնակցում է ԵԽ Մարդու իրավունքների և օրենքի գերակայության գլխավոր տնօրինության ղեկավար Ֆիլիպ Բուայան։
Յագլանդը շնորհակալություն է հայտնում ՀՀ Սահմանադրական դատարանի նախագահ Գագիկ Հարությունյանին խորհրդաժողովը կազմակերպելու համար։
«Խորհրդաժողովի ժամանակը շատ ճիշտ է ընտրված․ նոր ժողովրդավարությունները վերջին տարիներին հասունացել են։ Ես կցանկանայի որպես օրինակ նշել, որ Հայաստանն այս տարի նշում է ԵԽ-ի անդամակցության 15 տարին։Եվ ես կցանկայի հիշեցնել, որ այս ընթացքում Հայաստանն անգամ հաջողությամբ նախագահել է Նախարարների կոմիտեում։
Ես հատկապես ողջունում են Հայաստանի կողմից իրականացված առաջընթացը՝ ստանձնած պարտավորությունների և կոնկրետ հանձնառությունների կատարման համար՝ որպես ԵԽ անդամ։ Ես նաև ողջունում եմ մարդու իրավունքների, օրենքի գերակայության ու ժողովրդավարության ամրապնդմանն ուղղված հետագա բարեփոխումների կամքը»,-ասում է Թորբյորն Յագլանդը։
Գլխավոր քարտուղարը նշում է, որ Եվրոպայի խորհուրդը հետևողականորեն աջակցում է անդամ երկրներին՝ ժողովրդավարական բարեփոխումների ճանապարհին։ Եթե այն արվում է հետևողականորեն, ապա ստանում է գործողությունների ծրագրի տեսք, որի նպատակն է խթանել Հայաստանի բարեփոխումների օրակարգի համապատասխանությունը եվրոպական չափանիշների հետ։
Հայաստանի հետ Գործողությունների ծրագրի հիմնական առաջնահերթություններից է արդարադատության բարեփոխումները, մասնավորապես սահմանադրական արդարադատությունը։
«Ես մեծ գոհունակությամբ եմ նշում Հայաստանի ու Վենետիկի հանձնաժողովի սերտ համագործակցությունը սահմանադրական բարեփոխումների գործընթացում։ Եվ ես շատ ուրախ եմ տեսնել, որ Վենետիկի հանձնաժողովը խորհրդաժողովի համակազմակերպիչներից է, որը, ի թիվս այլ հարցերի, քննարկելու է հանձնաժողովի վերջին Օրենքի գերակայության լիստը։ Ես համոզված եմ, որ այսպիսի աջակցությամբ ԵԽ-ն կարող է նպաստել՝ հասնելու եվրոպական չափանիշների համապատասխանության։ Իհարկե, դեռևս կան բազմաթիվ ոլորտներ, որտեղ անհրաժեշտ է հետագա աշխատանք՝ առկա բացերը լրացնելու համար»,-ասում է Յագլանդը։
Գլխավոր քարտուղարը նշում է, քանի որ օրենսդրական բացերն ու իրավական անորոշությունը մտահոգություններ են, ապա այս խորհրդաժողովը կվերլուծի, թե ինչպիսի դեր կարող են սահմանադրական դատարանները կատարել դրանք հաղթահարելու համար։
«Ես հույս ունեմ, որ Ձեր քննարկումներում կկարողանաք հստակ գիծ սահմանել իրավական տեսության և կոնկրետ իրականացման միջև, որը կարող է կիրառվել նաև մյուս անդամ պետությունների կողմից։ Մենք, իհարկե, հաշվի կառնենք այն Ստրասբուրգում։ Անհամբեր սպասում եմ խորհրդաժողովի արդյունքներին»,- ասել է Թորբյորն Յագլանդը՝ մասնակիցներին մաղթելով բեղմնավոր քննարկումներ առաջիկա 2 օրերին։
