Արցախում գործող վիքի ակումբը հիմնադրվել է 2015 թվականի հոկտեմբերին. այն արդեն մեկ տարեկան է:
Արցախում գործող վիքի ակումբը մեկ տարեկան է
ՍՏԵՓԱՆԱԿԵՐՏ, 14 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Ստեփանակերտի վիքի ակումբի համակարգող Իրինա Սաֆարյանն ասել է, որ ակումբ կարող են հաճախել բոլոր ցանկացողները` առանց տարիքային սահմանափակության:
«Վիքիպեդիան ազատ հանրագիտարան է, որից օգտվել կարող են բոլորը: Ակումբի հիմնական նպատակն է ԼՂՀ-ի մասին գրել ավելի շատ հոդվածներ, քանի որ Արցախի մասին տեղեկությունները հայկական վիքիպեդիայում քիչ են: Հոդվածներ գրելիս օգտվում ենք տարբեր գրքերից, Հայկական Սովետական հանրագիտարանից, պետական-պաշտոնական կայքերից, զբոսաշրջության վարչության կողմից տրամադրվող նյութերից: Մեկ տարվա ընթացքում վիքի ակումբի անդամներս խմբագրել ենք Լեոյի «Անի» աշխատությունը և Արցախի մասին 600 հոդված»,-ընգծել է Ի. Սաֆարյանը՝ հավելելով, որ խմբագրական աշխատանքներին մասնակցում են 77 խմբագիրներ. նրանց մեջ կան ակտիվ անդամներ:
Ի. Սաֆարյանի խոսքով՝ առաջիկայում պատրաստվում են Արցախի շրջաններում և համայնքներում վիքի ակումբի նոր մասնաճյուղեր ևս բացել աշակերտների հետ այդ ուղղությամբ աշխատանքներ տանելու համար:
«Նախընտրելի է, որ գործընթացին ավելի շատ դպրոցականներ ներգրավվեն, քանի որ ծրագիրն ավելի գիտակրթական է: Վիքի խմբագիրներն աշխատանքներին զուգահեռ զբաղվում են նաև թարգմանություններով. այն նպաստում է խմբագրողների ինտելեկտի բարձրացմանը,-ավելացրել է Ի. Սաֆարյանը և ընդգծել,- կարծում եմ՝ այս ծրագիրը, հավուր պատշաճի ներկայացնելու դեպքում, լուրջ հաջողությունների ենք հասնելու: Իմ համոզմամբ՝ Արցախի ինքնության ճանաչման գործընթացին այն ևս նպաստելու է»:
Ի. Սաֆարյանը տեղեկացրել է նաև, որ Արցախի վիքի ակումբի լավագույն խմբագիրները շարունակելու են մեկնել ՀՀ տարբեր մարզեր՝ փորձառու վիքի խմբագիրների կազմակերպած դասընթացներին մասնակցելու համար:
«Դասընթացների ժամանակ կատարվում է փորձի փոխանակում, որը նպաստում է սկսնակ խմբագիրների կայանալուն: Յուրաքանչյուր համայնքից վիքի դասընթացներին մասնակցում է 4-5 խմբագիր»,-ավելացրել է Ի. Սաֆարյանը` մանրամասնելով, որ տարեկան երկու անգամ՝ ամռանը և ձմռանը, կազմակերպվում է նաև վիքի ճամբար, որին մասնակցում են խմբագիրներ ՀՀ բոլոր մարզերից, Արցախից և Սփյուռքից:
Խոսելով առաջիկա ծրագրերի մասին՝ վիքի ակումբի համակարգողը նշել է նաև, որ իրենք ցանկություն ունեն նոր ակումբներ բացել Հադրութի շրջանի Տող գյուղում, Ասկերանում, Շուշիիում, Քարվաճառում. ի դեպ անցած տարի իրենք այնտեղ վորքշոփ են կազմակերպել, որը խթանել է խմբագրական աշխատանքներին:
Ստեփանակերտի վիքի ակումբի ակտիվ խմբագիր, Օլեսյա Սահակյանը, ով 4 ամիս է, ինչ ակումբ է հաճախում, ասել է. «Թարգմանություններ և խմբագրական աշխատանքներ կատարելիս մենք, լրացուցիչ տեղեկություններ ստանալով, նյութերին ծանոթանում ենք բազմակողմանի՝ բարձրացնելով նաև մեր ինտելեկտը: Շատ եմ հետաքրքրված մուլտֆիլմերի թարգմանությամբ: Արդեն թարգմանել եմ «Արքայադուստր Սոֆիան», «Բարբոսկիները», «Առնոլդը» մուլֆիլմները»:
Հայկ Աթանեսյանն էլ, ով 9 ամիս է, ինչ հաճախում է Ստեփանակերտի վիքի ակումբ, ասել է.
«Ես այստեղ ստանում եմ գիտելիքներ: Հիմնականում խմբագրական աշխատանքներ եմ կատարում:
Ես մասնակցել եմ Աղվերանում կազմակերպված վորքշոփին: Շատ հետաքրքիր ու բովանդակալից օրեր էին. ես այնտեղ ձեռք եմ բերել նաև նոր ընկերներ»: