Ադրբեջանի նախագահական, Ազգային ժողովի և այլ պետական կառույցների պաշտոնական կայքէջերը Հայաստանի համար ժամանակ առ ժամանակ արգելափակվում են:
Ադրբեջանը, ի տարբերություն Հայաստանի, պարբերաբար արգելափակում է իր պետական կառույցների պաշտոնական կայքերը. Սամվել Մարտիրոսյան
ՍՏԵՓԱՆԱԿԵՐՏ, 18 նոյեմբերի, ԱՐՑԱԽՊՐԵՍ: Ինչո՞ւ են կայքերը արգելափակվում. Tert.am-ի հարցին է պատասխանել տեղեկատվական տեխնոլոգիաների անվտանգության փորձագետ Սամվել Մարտիրոսյանը:
Նա մանրամասնում է, որ խնդիրը նոր չէ, և ադրբեջանական կայքերը բավականին հաճախակի, երբեմն անհասկանալի պատճառներով արգելափակում են Հայաստանի համար իրենց պետական մարմինների պաշտոնական կայքերը:
«Նախագահական կայքը Հայաստանի համար արգելափակված էր, եթե չեմ սխալվում, 8-9 տարի առաջ: Իրենք արգելափակում էին, ենթադրում եմ, անվտանգության նկատառումներից ելնելով: Դա ավելի լրջացավ 2012-ին, երբ հայ հաքերական խմբերը մեծ խմբերով հարձակումներ սկսեցին»,- նշեց Մարտիրոսյանը:
Փորձագետը նաև նշում է, որ շատ դեպքերում կայքերն արգելափակվում են ավտոմատ կերպով, երբ որևէ երկրի IP-ների կողմից նկատվում է կասկածելի ակտիվություն:
Մարտիրոսյանը տեղեկացրեց նաև, որ Հայաստանում, ի տարբերություն Ադրբեջանի, միտումնավոր պետական կառույցների պաշտոնական կայքերը չեն արգելափակում, սակայն Հայաստանում ևս կա DDOE-ի դեմ պաշտպանության համակարգ, որի հետևանքով հնարավոր է՝ լինեն ավտոմատ արգելափակման դեպքեր: