Ստեփանակերտում ակտիվորեն ընթանում են քաղաքի փողոցների ամանորյա ձևավորման ու զարդարման աշխատանքները:
Հանրապետության գլխավոր տոնածառն արդեն տեղադրվում է. հայտնի է բացման օրը
ՍՏԵՓԱՆԱԿԵՐՏ, դեկտեմբերի 5, ԱՐՑԱԽՊՐԵՍ: Մի շարք փողոցներում տեղադրվել են տոնական վահանակներ, ինչպես նաև՝ լուսային էֆեկտներ, իսկ քաղաքի կենտրոնական՝ Վերածննդի հրապարակում այսօր մեկնարկել է նաև հանրապետության գլխավոր տոնածառի տեղադրման և զարդարման աշխատանքները:
«Արցախպրես»-ի թղթակցի հետ զրույցում, Ստեփանակերտի փոխքաղաքապետ Արմեն Հակոբյանը նշել է, որ մայրաքաղաքի լուսային ձևավորման աշխատանքներին այս տարի նույնպես աջակցել է Երևանի քաղաքապետարանը։
Ա. Հակոբյանի խոսքով, հանրապետության գլխավոր տոնածառի բացման արարողությունը նախատեսվում է դեկտեմբերի 17-ին, ժամը 17:00-ին, իսկ տոնական հիմնական միջոցառումները տեղի կունենան դեկտեմբերի 31-ին:
«Դեկտեմբերի 31-ին տոնական զարդարված մեքենաներով Ստեփանակերտի փողոցներով ու թաղամասերով շրջայց կկատարեն Ձմեռ պապն ու Ձյունանուշը, կշնորհավորեն փոքրիկներին՝ տրամադրելով նվերներ: Երեկոյան Վերածննդի հրապարակում տեղի է ունենալու ամանորյա տոնական համերգ, որը եզրափակվելու է հրավառությամբ»,- ասել է Ա. Հակոբյանը և հավելել, որ Ստեփանակերտի քաղաքապետարանի կողմից մայրաքաղաքի 2-6 տարեկան բոլոր երեխաներին կտրամադրվի նվերներ: