Անցած տարվա ընթացքում Արցախ ներկրված ավտոմեքենաների թիվը 2015թ-ի համեմատ աննախադեպ մեծ է եղել:
Անցած տարի Արցախ ներկրված ավտոմեքենաների թիվը աննախադեպ մեծ է եղել (ինֆոգրաֆիկա)
ՍՏԵՓԱՆԱԿԵՐՏ, հունվարի 17, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԼՂՀ
ճանապարհային ոստիկանության պետ Իգոր Օհանյանը: Նրա խոսքով, վերջին տարիներին դինամիկ կերպով աճում է Արցախ ներկրվող ավտոմեքենաների թիվը, իսկ 2016թ.-ին այս առումով ռեկորդ է գրանցվել՝ կազմելով 2568:
«Նշեմ, որ ավտոմեքենաների թվի գերաճը պայմանավորված չէ ապրիլյան ռազմագործողություններից հետո սփյուռքահայ մեր հայրենակիցների կողմից Պաշտպանության բանակին, որպես աջակցություն, ավտոմեքենաների տրամադրմամբ, քանի որ ՊԲ-ի համար ներկրված մեքենաները չեն հաշվառվում ճանապարհային ոստիկանության կողմից»,- ասել է ՃՈ պետը և հավելել, որ համեմատության համար 2015թ.-ին ներկրված մեքենաների թիվը կազմել էր 1535՝ այն դեպքում, երբ 2002 թվականին 389 մեքենա է ներկրվել հանրապետություն:
Ի. Օհանյանի դիտարկմամբ՝ մեքենաների ձեռքբերման նման դինամիկան հուշում է, որ կյանքի որակը տարեցտարի լավանում է: Ընդհանուր առմամբ, ըստ ճանապարհային ոստիկանության պետի՝ ներկայումս Արցախում գրանցված է 25853 ավտոմեքենա, իսկ թե ինչպիսին է եղել ավտոմեքենաների ներկրման և գրանցման վերջին տարիների դինամիկան, ներկայացնում ենք ինֆոգրաֆիկայի տեսքով: