Հունվարի 12-ից մեկնարկել են ներդպրոցական առարկայական օլիմպիադաները։
Մեկնարկել են ներդպրոցական առարկայական օլիմպիադաները
ՍՏԵՓԱՆԱԿԵՐՏ, հունվարի 18, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԼՂՀ կրթության և գիտության նախարարության աշխատակազմի ղեկավար Էրիկ Գրիգորյանը նշել է, որ ներդպրոցական, շրջանային (քաղաքային) և հանրապետական փուլերով առարկայական օլիմպիադան կշարունակվի մինչև մարտի 15-ը, իսկ դրան կհետևի եզրափակիչ փուլը՝ Հայաստանի Հանրապետությունում։
Է. Գրիգորյանի խոսքով, օլիմպիադան կազմակերպվում է հայոց լեզու, հայ գրականություն, օտար լեզու (անգլերեն, ռուսաց լեզու, գերմաներեն, ֆրանսերեն), պատմություն, հայոց եկեղեցու պատմություն, աշխարհագրություն, քիմիա, կենսաբանություն, մաթեմատիկա, ֆիզիկա, ինֆորմատիկա և նախնական զինվորական պատրաստություն առարկաներից:
«Մեծ ուշադրությամբ հետևում ենք դրանց ընթացքին, քանի որ արդյունքում վեր է հանվում աշակերտների գիտելիքների մակարդակը»,- ասել է Է. Գրիգորյանը։
Տեղեկացնենք, որ առարկայական օլիմպիադայի ներդպրոցական փուլի վերջին օրը հունվարի 25-ն է: Հունվարի 31-ից փետրվարի 15-ը տեղի է ունենալու շրջանային (քաղաքային) փուլը, իսկ փետրվարի 18-ից մարտի 15-ը՝ հանրապետական: