Կցանկանայի, որ Հայաստանի և Ադրբեջանի նախագահները վերադառնան բանակցային սեղանի շուրջ և ձեռնամուխ լինեն խաղաղության գործընթացի հետագա քայլերի շուրջ կառուցողական երկխոսության.
Կողմերը պետք է վերադառնան բանակցային սեղանի շուրջ և ծավալեն իրական երկխոսություն. ամերիկացի համանախագահ. Tert.am
ՍՏԵՓԱՆԱԿԵՐՏ, հունվարի 18, ԱՐՑԱԽՊՐԵՍ: ԼՂ հիմնախնդրի կարգավորման գործընթացում իր սպասումների մասին այսպես ասաց ԵԱՀԿ Մինսկի խմբի ամերիկացի նորանշանակ համանախագահ Ռիչարդ Հոգլանդը Tert.am-ի հետ բացառիկ զրույցում։
-Ըստ Ձեզ՝ հիմա ի՞նչ փուլում է Լեռնային Ղարաբաղի հիմնախնդրի կարգավորման գործընթացը հիմա: Ի՞նչ խնդիրներ ու առաջընթաց կա այստեղ:
-Խաղաղության գործընթացը, ցավոք, 2016թ. երկրորդ կեսին ձևավորված որոշ հնարավորություններ չօգտագործեց: Անհրաժեշտ է, որ կողմերը վերադառնան բանակցային սեղանի շուրջ և ծավալեն իրական ու կառուցողական երկխոսություն: Վստահության ձևավորման ու բանակցային գործընթացը առաջ տանելու համար նաև անհրաժեշտ է 2016թ. Վիենայի և Սանկտ Պետերբուրգի բարձր մակարդակի հանդիպումներում ձեռք բերված համաձայնությունների լիարժեք իրականացումը:
-Որպես ամերիկացի համանախագահ՝ ի՞նչ պարտավորվածություն եք վերցրել Ձեզ վրա, ո՞րը կլինի Ձեր մոտեցումը կարգավորման գործընթացում։
-Ինձ համար պատիվ է լինել ԵԱՀԿ Մինսկի խմբի ամերիկյան համանախագահը: Ես մտադիր եմ ընթանալ ամերիկյան նախորդ համանախագահների հետքերով ու շարունակել նույն նվիրվածությամբ աշխատել՝ օգնելու տարածաշրջանում տևական խաղաղության ու կայունության հաստատման ջանքերին: Այս խնդրին ես արդեն տասնյակ տարիներ հետևում եմ, ուզում եմ նաև ավելացնել, որ իմ դիվանագիտական գործունեության զգալի մասն անցել է հետխորհրդային տարածքում: Ես գիտեմ, որ այս խնդրի իրական կարգավորման համար կպահանջվի քաղաքական կամք ու առաջնորդում բոլոր ներգրավվածների կողմից: Վերջնական նպատակը խաղաղությունն ու բարեկեցությունն է տարածաշրջանի բոլոր ժողովուրդների համար:
-Սահմանում լարվածության ստեղծման համար հակամարտող կողմերը մշտապես մեղադրում են միմյանց: Հայկական կողմը երբեմն մեղադրում է նաև ԵԱՀԿ Մինսկի խմբին՝ լարվածություններից հետո ոչ հասցեական գնահատականների համար: Մենք ակնկալում ենք, որ Ադրբեջանը կմեղադրվի իր ակնհայտ ոտնձգությունների համար: Դուք ի՞նչ կարծիք ունեք դրա վերաբերյալ:
-Ինչպես հունվարի 9-ին նշեցին Համանախագահները, կողմերը պետք է դադարեցնեն փոխադարձ մեղադրանքները և ձեռնարկեն անհրաժեշտ միջոցներ տեղում իրավիճակը կայունացնելու համար։ Ես հասկանում եմ, որ ուժեղ էմոցիաները հանգեցնում են փոխադարձ մեղադրանքների, սակայն փոխադարձ մեղադրանքները խնդրի լուծում չեն: Բոլոր ներգրավվածների համար պետք է լինի միայն մի նպատակ, այն է՝ գտնել լուծումներ, որոնք կհանգեցնեն խաղաղության ու բարեկեցության տարածաշրջանի ողջ ժողովրդի համար:
-Կուզեի Ձեր կարծիքն իմանալ՝ ի՞նչ սպասենք այս տարի ԼՂ հիմնախնդրի կարգավորման գործընթացում:
-Ես կուզենայի, որ Հայաստանի և Ադրբեջանի նախագահները վերադառնան բանակցային սեղանի շուրջ և ձեռնամուխ լինեն խաղաղության գործընթացի հետագա քայլերի շուրջ կառուցողական երկխոսության: Ես գիտեմ, որ իմ գործընկեր ռուս և ֆրանսիացի նախագահները լուռ, դիվանագիտական ճանապարհով եռանդագին աշխատելու են, որպեսզի դա տեղի ունենա:
Մանրամասները՝ սկզբնաղբյուրում
