Մենք չենք կարող խորհրդարանական հինգ քաղաքական ուժերի տարբեր մոտեցումները նույն ձևով դնել Սահմանադրության մեջ, դա իրատեսական չէ:
Աշոտ Ղուլյանն արձագանքել է Էդուարդ Աղաբեկյանի դժգոհությանը
ՍՏԵՓԱՆԱԿԵՐՏ, հունվարի 19, ԱՐՑԱԽՊՐԵՍ: Այս մասին երեկ՝ հունվարի 18-ին, կայացած մամուլի ասուլիսի ժամանակ ասել է ԼՂՀ Ազգային Ժողովի նախագահ Աշոտ Ղուլյանը՝ անդրադառնալով ԱՀ Սահմանադրության նախագծի խորհրդարանական քննարկումների փուլին: ԱԺ նախագահի խոսքով, մասնագիտական հանձնաժողովը բոլոր խորհրդարանական ուժերի հետ հավասարապես աշխատել է՝ փորձելով ընդգրկել հնարավոր բոլոր առաջարկությունները:
«Մեր գործընկերների հետ քննարկումների արդյունքում Սահմանադրության նախագծում ներառել ենք խորհրդարանական կառավարման այնպիսի բաղադրիչներ, որոնք չկան նախագահական կառավարմամբ ոչ մի երկրի Սահմանդրության մեջ. համամասնական 100 տոկոսանոց ընտրություններ, խորհրդարանի կողմից վերահսկողական ֆունկցիաներ, տարբեր նշանակումներ և այլն»,- ասել է Ա. Ղուլյանը և ընդգծել, որ փորձել են քաղաքական ուժերի կողմից կատարված առաջարկությունները հնարավորինս համադրել այնքանով, որքանով թույլ է տվել հայեցակարգը:
Ի պատասխան «Արցախպրես»-ի թղթակցի այն հարցին, թե ինչքանով է Աժ խոսնակը համաձայն հունվարի 17-ին Խորհրդարանում կայացած արտահերթ նիստի ժամանակ ընդիմադիր՝ «Շարժում-88» խմբակցության ղեկավար Էդուարդ Աղաբեկյանի այն դժգոհությանը, թե Սահմանադրության նախագծի քննարկումները Աժ-ում պատշաճ ձևով չեն կազմակերպվել, Ա. Ղուլյանն ասել է, որ որևէ բան չի խախտվել և քննարկումներն ընթացել են Ազգային Ժողովի կանոնակարգի համաձայն: «Եթե համեմատության հիմքում 2006 թվականի Սահմանադրության ընդունման ժամանակ անցկացված խորհրդարանական մի քանի լսումներն են, ապա ասեմ, որ այն ժամանակ մենք հանրային քննարկումներ չենք անցկացրել»,- ասել է Ա. Ղուլյանը և հավելել, որ Խորհրդարանում ներկայացված ընդհանուր 127 առաջարկությունից 30-ը ընդունվել են մասնագիտական հանձնաժողովի կողմից: Խորհրդարանի խոսնակը դա համարեց լավ արդյունք և նշեց, որ բոլոր առաջարկությունները հեղինակների հետ առանձին-առանձին քննարկվել են: