Արցախի Հանրապետության նախագահ Բակո Սահակյանն այսօր՝ հունվարի 19-ին, ընդունել է Երևանի քաղաքապետ Տարոն Մարգարյանի գլխավորած պատվիրակությանը:
Բակո Սահակյանը պարգևատրվել է «Արգիշտի առաջին» հուշամեդալով
ՍՏԵՓԱՆԱԿԵՐՏ, հունվարի 19, ԱՐՑԱԽՊՐԵՍ: «Արցախպրես»-ի հաղորդմամբ, նախագահ Սահակյանի մոտ անցկացվել է ընդլայնված խորհրդակցություն՝ Երևանի քաղաքապետարանի և Ստեփանակերտի ու ԼՂՀ շրջանների համագործակցությանը վերաբերող հարցերի շուրջ: Բակո Սահակյանը նախ ողջունել է Երևանի քաղաքապետին ու նրա գլխավորած պատվիրակությանը, շնորհակալություն է հայտնել մայրաքաղաք Ստեփանակերտի և ԼՂՀ շրջանների հետ անցած տարիներին ակտիվ համագործակցության համար: Նախագահը վստահություն է հայտնել, որ ստեղծված են բարենպաստ պայմաններ համագործակցությունն էլ ավելի ամրապնդելու և նոր հաջողություններ արձանագրելու համար: Նրա խոսքով, Երևան քաղաքի հետ համագործակցությունը հնարավորություն է տալիս ոչ միայն լուծելու տարբեր սոցիալ-տնտեսական հարցեր, այլև նաև ստեղծել ամուր բարեկամական կապեր քաղաքամայր Երևանի և Արցախի միջև: «Մենք բարձր ենք գնահատում Ստեփանակերտի ու Արցախի շրջանների հետ կապերը զարգացնելու և խորացնելու Երևանի քաղաքապետարանի անկեղծ շահագրգռվածությունը և պատրաստակամությունը: Դա հայրենասիրության և քաղաքացիական բարձր կեցվածքի վառ դրսևորում է»,- ընդգծել է Բակո Սահակյանը:
Ելույթներով հանդես են եկել Երևանի և Ստեփանակերտի քաղաքապետները: Տարոն Մարգարյանը նշել է, որ 2012թ-ին Ստեփանակերտի քաղաքապետարանի հետ կնքված համագործակցության հուշագրին զուգահեռ՝ ակտիվ համագործակցություն են իրականացրել նաև Արցախի շրջանների հետ: «Կցանկանայի հատկապես առանձնացնել Ստեփանակերտում կառուցվող Ազատամարտիկների պուրակը: Այն մեզ համար ոչ միայն աշխատանք է, այլև՝ բարոյական պարտականություն: Ցանկանում եմ հավաստիացնել, որ Երևանը միշտ Արցախի կողքին է և շարունակելու ենք մեր ակտիվ համագործակցությունն ինչպես Ստեփանակերտի, այնպես էլ շրջանների հետ»,- ասել է Երևանի քաղաքապետը: Ելույթի վերջում Տ. Մարգարյանը հայտարարել է, որ Երևանի և Արցախի սերտ համագործակցության գործում ներդրած մեծ ավանդի համար Արցախի նախագահ Բակո Սահակյանը պարգևատրվում է «Արգիշտի առաջին» հուշամեդալով:
Տարոն Մարգարյանը Երևանի քաղաքապետի «Ոսկե մեդալով» պարգևատրել է նաև ԼՂՀ Պաշտպանության նախարար Լևոն Մնացականյանին, ԼՂՀ ոստիկանապետ Կամո Աղաջանյանին, Ստեփանակերտի քաղաքապետ Սուրեն Գրիգորյանին և պաշտոնատար այլ անձանց:
Կատարված աշխատանքների ամփոփիչ ելույթով հանդես է եկել նաև Ստեփանակերտի քաղաքապետ Ս. Գրիգորյանը, ով մասնավորապես նշել է, որ անցած հինգ տարիների ընթացքում ավելի քան 200 փոխայցելություն է եղել երկու քաղաքապետարանների աշխատանքային խմբերի միջև: «Լուրջ հաջողություններ ենք արձանագրել զբոսաշրջության, առողջապահության, մարզամշակութային և այլ ոլորտներում»,- ասել է Ս. Գրիգորյանը:
Հանդիպման վերջում ԼՂՀ Նախագահը պետական պարգևներ է հանձնել Երևանի քաղաքապետարանի և վարչական շրջանների մի խումբ աշխատակիցների` ԼՂՀ մայրաքաղաքում և շրջաններում սոցիալ-տնտեսական մի շարք ծրագրերի իրականացման գործում ունեցած նշանակալի ավանդի համար: