Մեսրոպ Մաշտոցի անվան Մատենադարանի մասնաճյուղը՝ «Մատենադարան-Գանձասար» գիտամշակութային կենտրոնը 2016 թվականի ընթացքում ընդունել է շուրջ 11 հազար տեղացի և օտարերկրյա այցելուների:
Գանձասարի Մատենադարանի նկատմամբ զբոսաշրջիկների հետաքրքրությունն ակնհայտ է. պատասխանատու
ՍՏԵՓԱՆԱԿԵՐՏ, փետրվարի 17, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Մատենադարան-Գանձասար գիտամշակութային կենտրոնի գործունեության պատասխանատու Արամ Թորոսյանը:
«Սա դրական ցուցանիշ է, եթե հաշվի առնենք ապրիլյան քառօրյա պատերազմին հաջորդած տուրիստական հոսքերի նվազման տենդենցը. հուսանք, որ ընթացիկ տարում զբոսաշրջիկների այցելություններն Արցախի Հանրապետություն էապես կաճեն: Բացի այդ պետք է նշեմ, որ Մատենադարանի մասնաճյուղի և ԼՂՀ ՊԲ-ի միջև համագործակցություն է հաստատվել, համաձայն որի մասնաճյուղն ընդունել է ԼՂՀ ՊԲ շուրջ 4000 զինակոչիկների և նորակոչիկների»,- մանրամասնել է Ա. Թորոսյանը:
Ա. Թորոսյանի համոզմամբ՝ Երևանի Մատենադարանը համաշխարհային հնչեղություն ունեցող գիտահետազոտական ինստիտուտ է, որի հեղինակությունը նաև անդրադառնում է մասնաճյուղի վրա:
«Գիտամշակութային կենտրոնը լուրջ խնդիր ունի իր գործունեության միջազգայնացման առումով: Երբ մենք կկարողանանք Մատենադարան-Գանձասար գիտամշակութային կենտրոնում պարբերաբար կազմակերպել միջազգային գիտաժողովներ, համաժողովներ և այլ միջոցառումներ, այդ ժամանակ էլ կարող ենք արձագանքների մասին որոշակի դատողություններ անել: Իսկ ցուցադրության առումով, օտարերկրյա զբոսաշրջիկների հետաքրքրությունն ակնհայտ է»,- ասել է Ա. Թորոսյանը:
Մատենադարան-Գանձասար գիտամշակութային կենտրոնի պատասխանատուի խոսքով՝ ստեղծման առաջին իսկ օրից իրենք կարևորել են այս կառույցի մշակութային, լուսավորչական առաքելությունն Արցախում՝ հատկապես երիտասարդության շրջանում:
«Դեռևս Մատենադարանի երջանկահիշատակ տնօրեն Հրաչյա Թամրազյանն էր նախաձեռնել լավագույն մասնագետների մասնակցությամբ տարբեր գիտամշակութային ծրագրեր իրականացնել: Առաջիկայում տեղի կունենա «Մշակութային ժառանգություն և հեռանկարներ» խորագրի ներքո դասախոսությունների շարք, որոնք կվարեն առաջատար գիտաշխատողները՝ ներկայացնելով հայ պատմության, մշակութային ֆենոմենի առանցքային շերտերը մշակութաբանական, վերլուծական և փաստագրական տեսանկյուններից: Երեխաների համար նախատեսվում է հայ միջնադարյան մանրանկարչության բացօթյա դասընթացներ անցկացնել ինչպես Մատենադարան-Գանձասար գիտամշակութային կենտրոնում, այնպես էլ Շուշիի պատկերասրահում: Գանձասարի եկեղեցու օծման 777-ամյակի կապակցությամբ միջոցառումների կազմակերպման նպատակով մենք համագործակցում ենք Հայ-առաքելական եկեղեցու Արցախի թեմի և ԱՀ կառավարության ու հատկապես Մշակույթի և երիտասարդության հարցերի նախարարության հետ»,-տեղեկացրել է Ա. Թորոսյանը և հավելել, որ մի շարք այլ ծրագրեր դեռ քննարկման փուլում են:
Նշենք, որ Մեսրոպ Մաշտոցի անվան Մատենադարանի մասնաճյուղ՝ «Մատենադարան-Գանձասար» գիտամշակութային կենտրոնի բացման հանդիսավոր արարողությունը տեղի է ունեցել 2015 թվականի նոյեմբերի 21-ին՝ Հայաստանի Հանրապետության նախագահ Սերժ Սարգսյանի և Լեռնային Ղարաբաղի Հանրապետության նախագահ Բակո Սահակյանի, պետական բարձրաստիճան պաշտոնյաների, հոգևոր դասի և գիտական հանրության ներկայացուցիչների մասնակցությամբ, և որի ստեղծման ու իրավական կարգավիճակի մասին ՀՀ Կառավարությունը վերջերս համապատասխան որոշում կայացրեց:
