Այսօր Ստեփանակերտի Մուրացանի անվան քաղաքային գրադարանում տեղի է ունեցել միջոցառում՝ նվիրված գիրք նվիրելու տոնին. այն նշվում է փետրվարի 19-ին:
Ստեփանակերտում գրքի տոնին նվիրված միջոցառում է կազմակերպվել
ՍՏԵՓԱՆԱԿԵՐՏ, փետրվարի 18, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել Մուրացանի անվան քաղաքային գրադարանի տնօրեն Մարիա Խաչատրյանը, ով կարևոր է համարել գիրք նվիրելու տոնը:
«Գիրքը միշտ էլ եղել է մարդու ամենամոտ բարեկամը: Մենք արժեվորում ենք տոնի խորհուրդը: Բոլորս էլ պետք է իմանանք ու գիտակցենք, որ գիրքը մեծ դեր ու նշանակություն ունի մեր կյանքում: Ընթերցողների կապը գրադարանի և գրողների հետ պետք է ավելի սերտացվի»,- ասել է Մ. Խաչատրյանը:
Նրա խոսքով՝ ողջ տարվա ընթացքում գրադարանը տարաբնույթ միջոցառումներ է կազմակերպում: Այդ միջոցառումների մասնակիցներն իրենք իսկ ընթերցողներն են. երևույթն ինքնին մեծ ձեռքբերում է:
Տոնի առթիվ գրադարանը հյուրընկալել է բանաստեղծ, թարգմանիչ, հրապարակախոս Հրանտ Ալեքսանյանին, ով իր խոսքում նույնպես կարևորել է գրքի արժեքը և խորհուրդ տվել բոլորին ավելի սերտ կապվել գրքին ու գրականությանը:
«Պետք չէ սահմանափակվել միայն դասագրքային հեղինակների ընթերցանությամբ: Ես կուզենայի, որ մեր ընթերցողները չվախենան նոր ոճի, տիպի, տեսակի ժամանակակից գրողների ստեղծագործություններից, այլ, ընդհակառակը, հակված լինեն սեփական ջանքերով, ինտելեկտով՝ յուրացնելու այդ նոր ստեղծագործությունները: Արվեստն առաջին հերթին նորարարություն է. ամեն ոք պետք է փնտրի նոր հեղինակի ստեղծագործություններ և ընթերցի այն ոչ թե թերթելով, այլ գրվածքի էությունն ըմբռնելով: Ընթերցողներս պետք է կարդանք և՛ հայկական և՛ արտասահմանյան գրականություն, որպեսզի ճանաչենք լավագույն գրողներին ու ծանոթ լինենք բոլորի ստեղծագործություններին»,-մասնավորապես ասել է Հ. Ալեքսանյանը:
Գրող Նվարդ Ալեքսանյանն էլ մեծարելով Հրանտ Ալեքսանյան գրողին, մասնավորապես ասել է. «Նա՝ որպես արվեստագետ, հետաքրքիր է առաջին հերթին իր ուրույն ձեռագրով: Ստեղծագործական այն կուռ համակարգը, գեղագիտական սկզբունքները, արժեքները և իր գրական արվեստի հավատամքն այն ուղին է, որին տասնամյակներ շարունակ Հ. Ալեքսանյանը ոչ միայն հավատարիմ է մնացել, այլ տարեցտարի զորացրել և դարձրել է մի արգասաբեր արժեք, պոետական մի աշխարհ, որով կարող ենք հիրավի հպարտանալ: Նա համահայկական գրական դաշտում ուրույն դեմք է: Նրա ստեղծագործություններում գրական-գեղարվեստական սկզբունքները շատ հզոր են: Թյուր կարծիք կա, թե իբր նրա ստեղծագործությունները դժվար ընկալելի են, սակայն եթե ուշադիր ընթերցենք, կհասկանանք, որ այդպես չէ»:
Այնուհետև գրադարանի ընթերցողները հանդես են եկել Հ. Ալեքսանյանի բանաստեղծությունների ընթերցմամբ:
Միջոցառման վերջում գրողը շնորհավորել է մասնակիցներին գիրք նվիրելու տոնի առթիվ և գրքեր բաժանել ներկաներին: