Ստեփանակերտի ՈւՀԱ թիմը Մոսկվայի և մերձմոսկովյան կենտրոնական լիգայում անցել է 1/8 եզրափակիչ:
Հայտնի են Ստեփանակերտի ՈւՀԱ թիմի Մոսկվայի և մերձմոսկովյան կենտրոնական լիգայի ելույթի արդյունքները
ՍՏԵՓԱՆԱԿԵՐՏ, փետրվարի 19, ԱՐՑԱԽՊՐԵՍ: Այս մասին «Արցախպրես»-ի հետ զրույցում ասաց թիմի ղեկավար Գեորգի Ավետիսյանը: Նրա խոսքով, արդեն մի քանի օր է՝ հայկական համացանցը ցնծում, իսկ ադրբեջանականը՝ հիստերիայի ամենավերջին դրսևորումներով քննարկում է Արցախի ՈՒՀԱ-ի թիմի հաղթանակը Մոսկվայի և Մերձմոսկովյան շրջանի լիգաների փառատոնում:
«Մեր թիմի ստեղծման առաջին իսկ օրից ադրբեջանական հիստերիան առաջնահերթ ուղղված էր հենց թիմի անվանմանը: Մրցույթի կազմակերպիչները թեև ուշադրություն չէին դարձնում այս հանգամանքին, ամեն դեպքում լարվածությունն առաջին հերթին տհաճ էր հենց թիմի համար, երբ անընդհատ մեր հասցեին կարդում էինք «сепаратисты из Карабаха» ու նմանատիպ շատ այլ հայտարարություններ: Թիմի վրա լրացուցիչ, ոչ դրական առումով ուշադրություն էին գրավում նաև ադրբեջանցիների՝ ՈՒՀԱ-ի ղեկավարությանը ուղղված բազմաթիվ բողոք-նամակները: Ու ամեն անգամ որոշակի բացատրական աշխատանք էինք տանում, մինչև որ բոլորին հասկացնում էինք, որ սա ոչ մի առնչություն չունի մրցույթի բովանդակության հետ:
Թիմի նկատմամբ ավելորդ լարվածությունը հանելու համար որոշեցինք «С хлебом и солью-Степанакерт» անվանումը փոխել և կոչել «Свадьба в горах», որովհետև, ստեղծագործական աշխատանքը թողած, ամբողջ օրը համացանցում ու մամուլում մեր հասցեին ուղղված այդ հիստերիկ արձագանքներին էինք պատասխանում»,- ասաց Ավետիսյանը և կեսկատակ ավելացրեց, որ մեր հարևան կոչվածը այդպես էլ չհասկացավ աղ ու հացի արժեքը:
Անդրադառնալով Մոսկվայի և մերձմոսկովյան կենտրոնական լիգայում թիմի ունեցած հաջողություններին՝ Ավետիսյանը նշեց, որ փետրվարի 16-ին ՈՒՀԱ-ի Արցախի թիմին հաջողվեց հասնել բարձրագույն գնահատականի: «Ժյուրին ու հանդիսատեսը սիրեցին մեր տղաների հումորը, և արդյունքում էլ «Свадьба в горах» թիմը հովանավորի կողմից ստացավ խաղի «լավագույն թիմ» տիտղոսն ու արժանացավ հատուկ մրցանակի»,- ասաց թիմի ղեկավարը և հավելեց, որ թիմի կողմից հատուկ շնորհակալություն է ցանկանում հայտնել հանրապետության վարչապետ Արայիկ Հարությունյանին աջակցության և «Արցախ ՀԷԿ» ընկերությանը հովանավորության համար:
Ըստ մեր զրուցակցի, թիմին հրաշալի աջակցում են «КВН»-ի հայտնի մեր տղաներից շատերը, որոնց հետ անձամբ շատ մտերիմ հարաբերություններ ունեն: Սակայն սցենարային ու ստեղծագործական բոլոր մյուս հարցերը գրում են իրենք: «Մենք ելույթներով հանդես ենք եկել նաև ՌԴ հայաշատ Ստավրոպոլ, Կրասնոդար քաղաքներում, և միշտ արժանացել ենք մեծ ընդունելության»,- ասաց Ավետիսյանը և ավելացրեց, որ թիմի առաջիկա պլաններն են` ամեն ինչ անել Մոսկվայի և Մերձմոսկովյան լիգայի 1/8 խաղին բարձր մակարդակով մասնակցելու համար:
