Մարսելու փետրվարի 18-ին մեծ բազմություն էր հավաքվել Միսաք Մանուշյանի հուշարձանի մոտ. լրանում է նացիստների կողմից Մանուշյանի խմբին մահապատժի ենթարկելու 73-րդ տարելիցը:
Մարսելում հարգել են Մանուշյանի և նրա խմբի անդամների հիշատակը
ՍՏԵՓԱՆԱԿԵՐՏ, փետրվարի 21, ԱՐՑԱԽՊՐԵՍ: Nouvelles d'Arménie-ի հաղորդմամբ, հայկական մի քանի կազմակերպությունների ավելի քան 500 անդամ էին հավաքվել հարգանքի տուրք մատուցելու «Կարմիր պաստառի» մարտիկներին:
Հնչել են ելույթներ: Բոլորն էլ ընդգծել են, որ անհրաժեշտ է Մանուշյանի և նրա ընկերների աճյունները տեղափոխել Ֆրանսիական պանթեոն: Վերջերս պղծվել էր Միսաք Մանուշյանի հուշարձանը, ինչը վրդովմունք էր առաջացրել հայկական կազմակերպությունների, բազմաթիվ պատգամավորների մոտ:
Միսաք Մանուշյանը ծնվել է 1906 թվականին Արևմտյան Հայաստանի Աղիյաման հայկական գյուղում: 1915 թվականի Հայոց Ցեղասպանության ժամանակ զրկվելով ծնողներից, հայտնվել է Սիրիայի ֆրանսիական մանկատանը, որտեղ և սովորել է ֆրանսերեն և ծանոթացել ֆրանսիական մշակույթին: 1925 թվականին տեղափոխվելով Ֆրանսիա, նա ակտիվ գործունեություն է ծավալել՝ հայերին իր շուրջը համախմբելով, գրական ամսագրեր հրատարակելով, անմասն չմնալով Ֆրանսիայի կյանքում տեղի ունեցող իրադարձություններից: Նացիստական զորքերի կողմից Ֆրանսիայի բռնազավթումից հետո Մանուշյանը ստեղծել է Ֆրանսիական դիմադրության շարժման ինտերնացիոնալ խումբ, սակայն նրան խմբի հետ միասին ձերբակալել են 1943 թվականին և երեք ամիս անց՝ 1944 թ. փետրվարի 21-ին, գնդակահարել: