Ստեփանակերտի Շառլ Ազնավուրի անվան մշակույթի կենտրոնում այսօր կայացել է ասմունքի հանրապետական մանկապատանեկան հոբելյանական 10-րդ մրցույթ-փառատոնը:
Ստեփանակերտում կայացել է ասմունքի հանրապետական մանկապատանեկան մրցույթ-փառատոն
ՍՏԵՓԱՆԱԿԵՐՏ, փետրվարի 22, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ մրցույթ-փառատոնի ծրագրի հեղինակ և ժյուրիի պատասխանատու քարտուղար Մարիետա Մակարյանն ասել է, որ ասմունքի մրցույթն ամեն տարի անց է կացվում ՀՀ նախկին վարչապետ Հովիկ Աբրահամյանի հովանավորությամբ:
«Այս տարի մրցույթ-փառատոնը նվիրվում է հայ գրականության երևելի սերնդի ներկայացուցիչներ Մարո Մարգարյանի 100 և Սիլվա Կապուտիկյանի 98-ամյակներին: Փառատոնն անց է կացվում Արցախում, Հայաստանի բոլոր մարզերում, Երևանում, Ջավախքում»,-ասել է Մ. Մակարյանը և նշել, որ ներկայացրած գրողների գործերից ամեն մի մասնակից իր ցանկությամբ ելույթի համար պիտի ընտրի երկու ստեղծագործություն:
Մ. Մակարյանի խոսքով՝ ասմունքի հանրապետական նախորդ մրցույթներում արդեն մրցանակների արժանացածներն այս մրցույթ-փառատոնին իրավունք չունեն մասնակցելու:
ԼՂՀ կրթության, գիտության և սպորտի նախարարության նախադպրոցական և արտադպրոցական բաժնի գլխավոր մասնագետ Էլմիրա Հովհաննիսյանը մեզ հետ զրույցում տեղեկացրել է, որ Ստեփանակերտից և շրջաններից հանրապետական փուլին մասնակցել է 40 աշակերտ:
«Մրցույթին մասնակցում են տարիքային 2 խումբ՝ բաղկացած 11-14 և 15-17 տարեկան աշակերտներից: Երկու տարիքային խմբերից՝ 1-3 տեղեր զբաղեցրած 6 մասնակիցները մարտին հանդես են գալու Երևանում կայանալիք եզրափակիչ փուլում,-նշել է Է. Հովհաննիսյանը և ավելացրել,-այս փառատոնի նպատակը խիստ արդիական է. փորձել ենք երիտասարդ սերնդի ուշադրությունը կրկին սևեռել հայ պոեզիային՝ վեր հանելու համար ասմունքի հարուստ ավանդույթները՝ դրանով իսկ մեկ անգամ ևս ընդգծելով հայ գրողների թողած հարուստ ժառանգությունը»:
Ժյուրիի կազմում ընդգրկված էին գրականագետներ, ամունքողներ, դերասաններ և ԼՂՀ ԱԺ պատգամավորներ:
Նշենք նաև, որ փառատոնը մեկնարկել է 2016 թվականի դեկտեմբերի 5-ից:
