Եվրոպայի խորհրդի խորհրդարանական վեհաժողովի պատվիրակությունը, որը փետրվարի 22-23-ին դիտորդական առաքելությամբ գտնվում էր Հայաստանում՝ ապրիլի 2-ին նախանշված խորհրդարանական ընտրություններից առաջ, հրապարակել է հայտարարություն։
ԵԽԽՎ դիտորդական առաքելությունը հայտարարություն է տարածել
ՍՏԵՓԱՆԱԿԵՐՏ, փետրվարի 24, ԱՐՑԱԽՊՐԵՍ: Պատվիրակությունը կիսում է Վենետիկի հանձնաժողովի կարծիքը, որում նշում է, որ Հայաստանում ընտրական օրենսդրությունը հնարավորություն է տալիս անցկացնել ազատ ու ժողովրդավարական ընտրություններ, եթե այն կիրառվի բարեխղճորեն ու լինի քաղաքական կամք, հայտնում է panorama.am-ը։
«Այնուամենայնիվ, լսելով նոր ընտրական օրենսգրքի մանրամասն բացատրությունները, պատվիրակությունը դեռևս գտնում է, որ այն շատ բարդ է, որպեսզի հասկացվի հանրության կողմից, ինչն էլ կարող է հանգեցնել շփոթության ու ավելացնել ընտրական գործընթացի նկատմամբ առկա անվստահությունը»,-ասվում է հայտարարության մեջ։
Պատվիրակությունը հիշեցնում է, որ ՀՀ նախորդ ընտրություններում դիտորդական առաքելությունների կողմից քննադատվել է վարչական ռեսուրսի չարաշահումը, ընտրակաշառքի մեղադրանքները, ահաբեկումը ու նշում, որ այս հնարավոր չարաշահումները դեռևս համատարած են։
Նշվում է, որ նոր տեխնոլոգիաները կոչված են կանխելու խախտումները ընտրության օրը, սակայն, պատվիրակությունը նշում է, որ այն չպետք է դիտարկվի որպես վստահության փոխարինող։ Այս առումով, դիտորդական առաքելությունը պատկան մարմիններին խնդրում է ձեռնարկել բոլոր անհրաժեշտ միջոցները, հիերարխիկ բոլոր մակարդակներում ու ողջ երկրում, որպեսզի կանխվի նման պրակտիկան նախընտրական շրջանում ու ընտրության օրը։
«Պատվիրակությունը հույս ունի, որ ընտրության օրը տեղական ու միջազգային դիտորդներին հնարավորություն կտրվի ազատորեն դիտարկել այն՝ առանց ընտրատեղամասից վտարվելու վախի, եթե նրանք մատնացույց անեն խախտումները։ «Սուտ մատնության» ու լրատվամիջոցին ուղղված իր աղբյուրի բացահայտման պահանջը պետք է վերացնել։ Մյուս կողմից, նրանք, ովքեր պատասխանատու են ցանկացած տեսակի խախտման համար քարոզարշավի կամ ընտրության օրը, պետք է ենթարկվեն խիստ պատժի»,-ասվում է հայտարարության մեջ։
Պատվիրակությունը գտնում է, որ Հայաստանի քաղաքական մշակույթը դեռևս զարգացման կարիք ունի, քանի որ քաղաքականությունը կապված է անձերի, այլ ոչ թե գաղափարախոսությունների ու քաղաքական ծրագրերի հետ՝ երկրում քաղաքական, տնտեսական ու սոցիալական խնդիրները լուծելու հստակ առաջարկություններով։
Պատվիրակությունը նշում է, որ լսել է, թե ընդդիմադիր քաղաքական կուսակցություններին հովանավորելը չի խրախուսվում ու գործարարները կարող են վտանգել իրենց բիզնեսը, եթե որոշեն հովանավորել այդ կուսակցություններին։ Պատվիրակությանը ՀՀ-ում հանդիպումների ժամանակ ասել են, որ առկա է սոցիալական պասիվություն ու այս առումով ընդգծվում է, որ ի շահ հայ հասարակության՝ շատ կարևոր է, որ վերականգնվի հանրային վստահությունը ժողովրդավարական ընտրական գործընթացի նկատմամբ։
Հիշեցնենք, որ ԵԽԽՎ դիտորդական առաքելությունը ՀՀ-ում էր ՀՀ ԱԺ նախագահի հրավերով։ 3 հոգանոց պատվիրակության ղեկավարն է Շվեյցարիան ներկայացնող Լիլիան Մորի Պասկիեն։ 32 հոգուց կազմված ԵԽԽՎ ամբողջական դիտորդական առաքելությունը կլինի Հայաստանում մարտի վերջին ու կդիտարկի ապրիլի 2-ի ընտրությունները։
