Աշխարհահռչակ հայազգի երգչուհի Շերն իր հիացմունքն է հայտնել Հայոց ցեղասպանության մասին «Խոստում» ֆիլմի առնչությամբ:
«Խոստում» ֆիլմը կոտրել է Շերի սիրտը
ՍՏԵՓԱՆԱԿԵՐՏ, մարտի 18, ԱՐՑԱԽՊՐԵՍ: Հայտնի երգչուհի Շերը «Խոստում» ֆիլմի վերաբերյալ գրառում է կատարել թվիթերյան իր միկրոբլոգում, հաղորդում է armeniasputnik.am-ը:
«Այս ֆիլմը կոտրեց իմ սիրտը, ոչ միայն հայերի, այլ նաև բոլոր այն մարդկանց համար, ովքեր տառապել են և կորցրել իրենց սիրելիներին»,-գրել է Շերը:
Գրառումից հետո երգչուհին հրապարակել է նաև ֆիլմի պաստառը:
Հիշեցնենք, որ երգչուհին «Խոստում» ֆիլմի վերաբերյալ մեկ այլ գրառում էլ հրապարակել էր անցած տարվա աշնանը: «Այս գիշեր դիտեցի «Խոստումը» ֆիլմը: Ճշմարիտ պատմություն այն մասին, թե 1915 թվականին թուրքերն ինչպես կոտորեցին 1.5 միլիոն հայի: Էրդողան փաշա… այլևս երբեք»,- գրել էր Շերը: Քըրք Քըրքորյանի հովանավորությամբ նկարահանված ֆիլմի ստեղծման գործում պրոֆեսիոնալ թիմ է աշխատել։ Ֆիլմի ռեժիսոր օսկարակիր Թերի Ջորջը ընտրել է տաղանդավոր և իրենց գործում հմուտ դերասանների՝ Քրիստիան Բեյլ, Օսկար Այզեկ, Շառլոտա Լե Բոն, Անժելա Սարաֆյան, Ջեյմս Քրոմվել եւ ուրիշներ, իսկ կինոնկարի սաունդթրեքը գրել է աշխարհահռչակ հայ երաժիշտ Սերժ Թանկյանը։ Ֆիլմի հիմքում սիրո պատմություն է, որի դեպքերը զարգանում են Հայոց ցեղասպանության տարիներին։