Կարեն Կարապետյանն այսօր ընդունել է Եվրասիական տնտեսական միության անդամ պետությունների տեղեկատվական տեխնոլոգիաների ոլորտի ղեկավարներին:
ԵԱՏՄ անդամ պետությունների ՏՏ ոլորտի ղեկավարներին ընդունել է Կարեն Կարապետյանը
ՍՏԵՓԱՆԱԿԵՐՏ, մարտի 24, ԱՐՑԱԽՊՐԵՍ: Պատվիրակությունը Հայաստան է ժամանել ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանի նախաձեռնությամբ կազմակերպված աշխատաժողովին մասնակցելու նպատակով:
Ողջունելով պատվիրակության այցը մեր երկիր՝ վարչապետ Կարապետյանը համոզմունք է հայտնել, որ ԵԱՏՄ անդամ երկրների ՏՏ բնագավառի ղեկավարների մասնակցությունը հերթական աշխատաժողովին նոր խթան կհաղորդի ոլորտում ծավալված համագործակցությանը: «Մենք համատեղ ստեղծել ենք լավ ներուժ ունեցող ակումբ եւ կարեւորում ենք ԵԱՏՄ շրջանակում տեղեկատվական տեխնոլոգիաների ու թվայնացման ոլորտում համաձայնեցված քաղաքականության իրականացումը», - ասել է կառավարության ղեկավարը՝ մաղթելով արդյունավետ աշխատանք:
ԵԱՏՄ անդամ երկրների ՏՏ ոլորտի ղեկավարները շնորհակալություն են հայտնել ՀՀ կառավարությանը՝ Հայաստանում հանդիպում անցկացնելու նախաձեռնության եւ պատշաճ ընդունելության համար: Նրանք նշել են, որ նման աշխատանքային հանդիպումները լավ հարթակ են՝ ոլորտին վերաբերող հարցերը քննարկելու եւ ինչպես ԵԱՏՄ անդամ յուրաքանչյուր երկրում, այնպես էլ միության շրջանակում տնտեսական աճի զարգացման նախադրյալներ ձեւավորելու համար: ԵԱՏՄ անդամ երկրների ՏՏ ոլորտի ղեկավարները ՀՀ վարչապետին տեղեկացրել են, որ աշխատաժողովի շրջանակում նախատեսվում է անդրադառնալ թվայնացման եւ ՏՏ բնագավառում փոխգործակցության օրակարգին,ինչպես նաեւ յուրաքանչյուր անդամ երկրում համակարգման մարմնի ստեղծմանը վերաբերող հարցերին: