Բելառուսը դուրս չի գա Եվրասիական տնտեսական միությունից:
ԵԱՏՄ-ն թիմային գործընթացներ է ենթադրում, որին Բելառուսը պատրաստ չէ. Լուկաշենկոն սովոր է հարցերը լուծել նախագահների մակարդակով. Լուկյանով (Tert.am)
ՍՏԵՓԱՆԱԿԵՐՏ, փետրվարի 26, ԱՐՑԱԽՊՐԵՍ: Tert.am-ի հետ զրույցում այս մասին ասաց քաղաքական վերլուծաբան Ֆյոդոր Լուկյանովը՝ անդրադառնալով ռուս-բելառուսական լարված հարաբերություններին:
Ռուսական և բելառուսական մամուլը տևական ժամանակ գրում է ռուս-բելառուսական հարաբերությունների լարվածության մասին, որը դրսևորվեց նախ գազի մատակարարման թեմայի շուրջ առաջացած տարակարծություններով, ինչի արդյունքում ՌԴ վարչապետ Դ. Մեդվեդևն ընդհուպ հայտարարեց, թե ԵԱՏՄ անդամակցությունը Ռուսաստանից էժան գազ գնելու հնարավորություն է, իսկ Բելառուսի նախագահ Ա. Լուկաշենկոն էլ ավելի ուշ հակադարձեց, որ իրենք ոչ թե գազի գնի էժանացում են ակնկալում, այլ՝ միութենական պարտավորվածությունների կատարում, ապա Բելառուսից Ռուսաստան որոշ ապրանքների արտահանման դադարեցմամբ:
Այս առնչությամբ Tert.am-ը Լուկյանովից հետաքրքրվեց՝ հնարավո՞ր է լարվածությունը հասնի նրան, որ Բելառուսը դուրս գա ԵԱՏՄ-ից` հաշվի առնելով նաև Մեդվեդևի հայտարարությունը, թե Եվրասիական միությունում «որևէ մեկին ուժով չեն պահում»:
«Բելառուսը ԵԱՏՄ-ից ոչ մի տեղ էլ դուրս չի գա: Ռուս-բելառուսական հարաբերություններն ունեն ավելի հին պատմություն, քան Եվրասիական ինտեգրացիան: Պաշտոնական Մինսկի և Մոսկվայի հարաբերությունները միշտ էլ յուրօրինակ կերպ են դրսևորվել, կառուցվել: Դա կապված է Բելառուսի առաջնորդի յուրահատկությամբ, ով քաղաքական տարբերվող ու իրեն հատուկ ոճ ունի: Բելառուսը տնտեսապես շատ է կախված Ռուսաստանից, բայց ամեն կերպ փորձում է ցույց տալ, դիրքավորվել որպես անկախ խաղացող»,- պատասխանեց Ֆյոդոր Լուկյանովը:
Ներկայումս, քաղաքական վերլուծաբանի խոսքով, լարվածության ենթատեքստը ոչ թե ԵԱՏՄ-ից դուրս գալն է, այլ դաշնակցային հարաբերությունները Եվրասիական միության մեջ տեղավորելը:
«Երբ ԵԱՏՄ-ն նոր էր ձևավորվում, այն ձևավորվում էր որպես ապագայի միություն: Բայց իրադարձություններն այլ հունով ընթացան և հրաժարվել դաշնակցային հարաբերություններից հիմարություն կլինի: Միաժամանակ, 90-ականների այդ մոդելն իրեն սպառեց, ավելի շուտ՝ կատարեց իր առաջ դրված խնդիրն ու հարկավոր է նոր մոդել: Սակայն, սա փոքր-ինչ բարդ կլինի, որովհետև Բելառուսը սովոր է հատուկ ուշադրության: Բելառուսն իր հարցերը մշտապես լուծել է Ռուսաստանի հետ տետ ա տետ, նախագահների մակարդակով: Իսկ ԵԱՏՄ-ն թիմային գործընթացներ է ենթադրում, որին Բելառուսը պատրաստ չէ»,- ընդգծեց Ֆյոդոր Լուկյանովը:
Իսկ Մեդվեդևի հայտարարությունը, թե ԵԱՏՄ-ում «որևէ մեկին չեն պահում», Լուկյանովը գնահատեց որպես «մեղմ ասած հայտարարություն, որը չպետք է արվեր»:
Վերլուծաբանը հիշեցրեց, թե ռուս-բելառուսական հարաբերությունները նոր չեն լարվել, դրանց հրետորաբանությունը փոխվել էր դեռևս 2000-ականներից, բայց «ամեն հաջորդ սրացումն ավելի շատ է լարում իրավիճակը»:
Մանրամասները՝ սկզբնաղբյուրում
