Շուշիի տեխնոլոգիական համալսարանում գործում է հետազոտական և գիտակրթական կենտրոն, որի հիմնական խնդիրը մեր ուսանողների ներգրավմամբ համալսարանում գիտահետազոտական աշխատանքների կազմակերպումն է:
Շուշիի տեխնոլոգիական համալսարանը նոր հանրակացարան կունենա
ՍՏԵՓԱՆԱԿԵՐՏ, մարտի 27, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Շուշիի տեխնոլոգիական համալսարանի ռեկտոր, տեխնիկական գիտությունների դոկտոր, պրոֆեսոր Հովհաննես Թոքմաջյանը: Համալսարանն ունի 8 ամբիոններով 3 ֆակուլտետ, որտեղ ուսանում են 33 մասնագիտությունների գծով 500 ուսանող:
«Մեր համալսարանում մենք անում ենք ամեն ինչ, որպեսզի կարողանանք արժանի մասնագետներ պատրաստել Արցախի համար: Մենք գիտակցում ենք՝ համալսարանը պետք է որակյալ մասնագետներ պատրաստի, որ նրանք իրենց ստացած գիտելիքներով հետագայում կարողանան նպաստել Արցախի տնտեսության զարգացմանը, երկրի շենացմանն ու բարգավաճմանը,-ասել է Հովհ. Թոքմաջյանը և ավելացրել,- ցանկություն ունենք նաև համալսարանում ստեղծել ռազմական ամբիոն. այն մեր ուսանողներին հնարավորություն կտա համալսարանն ավարտելուց հետո ստանալ սպայական կոչում»:
Ըստ Հովհ. Թոքմաջյանի՝ համալսարանում միջին մասնագիտական կրթությունը 3 տարի է, բակալավրիատինը՝ առկա բաժնում 4 տարի, հեռակայում՝ 5: Մագիստրատուրայի առկա բաժնի ուսման տևողությունը 2 տարի է, հեռակայինը՝ 3:
«Շուշիի տեխնոլոգիական համալսարանը ապահովված է հանրակացարանով. այն համապատասխանում է ժամանակակից չափորոշիչներին: Յուրաքանչյուր սենյակի համար նախատեսված է սանհանգույց: Հանրակացարանում ապրող ուսանողներն օգտվում են նաև տաք ջրից: Յուրաքանչյուր հարկում կան հանգստի սենյակ, լվացքատուն, արդուկարան, չորանոց: Առաջին հարկում տեղակայված է ուսանողական ճաշարանը, էլեկտրոնային գրադարանը, սերվերային սենյակը, բուժկետը: Հանրակացարանն ունի նաև համակարգչային կաբինետ: Տեղադրված հեռուստացույցներն արբանյակային ալեհավաքներով հեռարձակվում: Հանրակացարանի այգում տեղակայված են նստարաններ, ճեմուղիներ, լուսամփոփներ, ջրավազան և այլն: Հանրակացարանի կարիք ունեցող մեր բոլոր ուսանողները կապահովվեն կացարաններով,-մանրամասնել է Հովհ. Թոքմաջյանը և տեղեկացրել,- ուրախալին նաև այն է, որ համալսարանն առաջիկայում ունենալու է ևս մեկ նոր հանրակացարան»:
Ռեկտորի հավաստմամբ՝ իրենց համալսարանը համագործակցության պայմանագիր ունի ստորագրած ՀՀ փորձաքննությունների ազգային բյուրոյի և Կազանի պետական ճարտարապետաշինարարական համալսարանի հետ:
«Համալսարանն օնլայն դասեր է անցկացնում տեխնիկական միջոցներով հագեցած 2 լսարանում: Մեր նպատակն է՝ Արցախի բոլոր դպրոցների հետ օնլայն կապ հաստատել, որպեսզի հեռահար ուսուցման միջոցով իրականացվեն ոչ միայն դիմորդների մասնագիտական կողմնորոշումը, այլև անցկացվեն վերապատրաստման դասընթացներ»,-հավելել է Հովհ. Թոքմաջյանը:
Հովհ. Թոքմաջյանի խոսքով՝ համալսարանի գրադարանն ունի 35 հազար կտոր գրականություն: